Aqmola ákimi merdigerlerge jumysty shıratýdy tapsyrdy
KÓKShETAÝ. QazAqparat - Aqmola oblysynda «Aýyl - el besigi» arnaıy jobasyn júzege asyrý barysy aımaq basshysy Ermek Marjyqpaevtyń jiti baqylaýynda, dep habarlaıdy QazAqparat tilshisi ákimdiktiń baspasóz qyzmetine silteme jasap.
Oblystaǵy eldi mekenderdiń ınjenerlik-kommýnıkatsııalyq ınfraqurylymy men áleýmettik obektilerin damytýǵa bólingen qomaqty memlekettik qarjyny tıimdi paıdalaný aımaq basshysynyń udaıy baqylaýynda. Sol sebepti oblys ákimi jergilikti jerlerge baryp, atqarylyp jatqan jumystardyń barysymen tanysyp júr.
Osy maqsatta aımaq basshysy Ermek Marjyqpaev Arshaly aýdanynda bolyp, «Aýyl - el besigi» arnaıy jobasy sheńberinde quny 1,3 mıllıard teńge bolatyn úsh jobany júzege asyrý jumysymen tanysty. Oblys ákimi ótken aıda ǵana Arshaly kentinde bolyp, dene shynyqtyrý-saýyqtyrý kesheniniń qurylysy, №2 orta mekteptiń kúrdeli jóndeýi, sondaı-aq kóshe-jol jelisin jaqsartý jumystarynyń bastalýyna kóńil bólgen edi.
Búgingi tańda mektepte tereze bloktary ornatylǵan, qasbetinde jumystar júrgizilýde. Injenerlik jeliler men tóbesi túgel aýystyrylady. Іrgesi 1964 jyly qalanǵan mektepke 56 jyl ótken soń ǵana kúrdeli jóndeý jumystary júrgizilýde. Osyǵan baılanysty mektep oqýshylary Jumabek Táshenov atyndaǵy mektepke ýaqytsha aýystyryldy. Qos mekteptiń oqýshylary eki aýysymda oqyp jatyr. Ermek Marjyqpaev merdigerlerge jumysty shıratyp, kún sýytqansha negizgi jumystardy aıaqtaýdy tapsyrdy.
Ortalyq kóshelerdiń 7 shaqyrymynda asfalt tóselip, shuńqyrlar tegistelgen. Kóshe syzyqtary salynyp, avtobýs aıaldamalary men kóshe belgileri ornatylǵan. Oblys ákimi kelesi jyly kentte zamanaýı trotýarlar qurylysyn salý úshin aldyn ala josparlaýdy tapsyrdy.
Óńir basshysynyń dene shynyqtyrý-saýyqtyrý kesheni qurylysynyń baıaý qarqynyna kóńili tolmady.
«Jumys kestesin ózderińiz jasap alǵansyzdar. Aýa raıyn kórip otyrsyzdar ǵoı, jumysty shıratý kerek», - dedi aımaq basshysy.
Budan bólek, aımaq basshysy kópqabatty úıler qosylǵan jańa jylý qazandyǵynda boldy.
