Aqmola: 2,5 myńnan astam adam mas kúıinde kólik júrgizip, jol erejesin buzǵan
Vedomstvonyń dereginshe, óńirde tirkelgen jol-kólik oqıǵalarynyń basym bóligi - kólikterdiń joldyń qarsy baǵytyna shyǵyp ketýine tıesili bolyp otyr.
«Bıylǵy jyldyń 11 aıynda Aqmola oblysynyń joldarynda jyldamdyqty shamadan tys asyrý boıynsha 20 myńnan astam oqıǵa tirkelip, ereje buzǵan júrgizýshiler QR ÁQbK 592-baby boıynsha ákimshilik jaýapkershilikke tartyldy. Budan bólek 2500-nan astam júrgizýshiniń mas kúıinde kólik basqarǵany anyqtaldy», - dedi vedomstvodan.
Sonymen qatar, jol kólik oqıǵasyna jaıaýlardyń da qatysy bary anyqtaldy. Jaıaý júrginshiler kóbinese baǵdarshamnyń qyzyl túsi men joldyń ruqsat etilmegen tusynan júgirip ótip, kólik júrgizýshilerine kedergi keltiredi. Jyl basynan beri 14 myńnan astam jaıaý júrginshi jol qozǵalysy erejesin buzǵany úshin ákimshilik jaýapkershilikke tartylǵan.
Sol sebepti, jergilikti polıtsııa qyzmeti jol-kólik oqıǵasynyń aldyn alý maqsatynda apta saıyn «Avtobýs», «Qaýipsiz jol», «Nazar aýdaryńyz, jaıaý», «Qaýipsizdik aptalyǵy» sııaqty sharalardy turaqty túrde uıymdastyryp keledi. Osy oraıda, polıtseıler qys aılarynda joldardyń kóktaıǵaq bolýyna baılanysty aqmolalyqtardy jolǵa shyqqanda saq bolýǵa shaqyrady.