Aqmol kentinde 42 áskerı qyzmetshi otbasylarymen jańa páterge qonys tebedi

ASTANA. QazAqparat - Aqmol kentinde kúrdeli jóndeýden keıin jalpy alańy 3 390 sharshy metr 42 páterlik turǵyn úı paıdalanýǵa berilmek, dep habarlady QR Qorǵanys mınıstrligi baspasóz qyzmetinen.

Qazir jóndeý jumystary aıaqtalyp qaldy. Jospar boıynsha osy aıda áskerı qyzmetshiler men olardyń otbasylary jańartylǵan páterlerine ornalasady.

Budan sál buryn Gvardeıskıı kentinde 52 páterlik turǵyn úı kúrdeli jóndeýden keıin tapsyrylǵan bolatyn. Jóndeý jumystaryn júrgizý kezinde turǵyndar kóshirilgen edi. Kúrdeli jóndeýden keıin olardy qýantarlyq tosyn syı kútip turdy: úıdiń barlyq terezeleri men esikteri aýystyryldy, shatyry, ınjenerlik jelileri jańartyldy. Úıdiń qasbeti jóndeldi.

Sonymen qatar, qazirgi ýaqytta Aıagóz qalasynda jalpy alańy 5 790 sharshy metrlik 90 páterlik turǵyn úıge jóndeý jumystary júrgizilýde. Jumysty tolyqqandy aıaqtaý 2016 jylǵa josparlandy.

Kúrdeli jóndeý qazaqstandyq áskerı qyzmetshilerdiń turmys jaǵdaıyn jaqsartý úshin daıyn turǵyn úılerdi satyp alý men olardy salýmen qatar, mınıstrliktiń turǵyn úımen qamtamasyz etý júıesiniń bir bóligi.

Ótken jylǵy málimetter boıynsha, Aıagóz jáne Aqtas qalalarynda 80 páterlik turǵyn úıler, sondaı-aq Gvardeıskıı kentindegi 98 páterlik jáne Prıozersk qalasynda 36 páterlik jataqhanalar kúrdeli jóndeýden ótkizilgen bolatyn.