«Ákimniń tsıfrlyq jumys orny» jobasy 1894 aýyldyq okrýgti qamtydy
ASTANA. KAZINFORM – Qazaqstanda aýyldyq aýmaqtardy basqarýdyń tıimdiligin arttyrýǵa baǵyttalǵan «Ákimniń tsıfrlyq jumys orny» jobasy kezeń-kezeńimen engizilip jatyr.
Eńbek jáne halyqty áleýmettik qorǵaý mınıstrliginiń málimetinshe, búginde joba elimizdiń 17 oblysy men 1894 aýyldyq okrýgin qamtıdy.
Jobanyń negizgi maqsaty – ákimderdi artyq qaǵazbastylyqtan aryltyp, aýyldaǵy áleýmettik-ekonomıkalyq ahýal týraly barlyq mańyzdy derekti bir platformaǵa jınaqtaý.
– Júıe Otbasynyń tsıfrlyq kartasy negizinde ázirlenip, 30-dan astam memlekettik aqparattyq júıeniń derekterin biriktirdi, – delingen habarlamada.
Platformada turǵyndardyń tabysy, jumyspen qamtylýy jáne áleýmettik mártebesi týraly málimettermen qatar, jyljymaıtyn múlik, ınfraqurylym, densaýlyq saqtaý, bilim berý salalarynyń kórsetkishteri jáne memlekettik qoldaý sharalaryn alýshylar jónindegi aqparat qamtylǵan.
Mınıstrliktiń málimetinshe, derekterge jedel qoljetimdilik ákimderge naqty muqtaj azamattardy anyqtap, áleýmettik qoldaý sharalaryn tıimdi baǵyttaýǵa múmkindik beredi.
– Sondaı-aq memleket ómirlik qıyn jaǵdaıǵa tap bolǵan azamattardy aldyn ala anyqtap, qajetti kómekti proaktıvti formatta usyna alady, – dep atap ótti vedomstvo.
Joba aýyldyq ákimdikterdiń ákimshilik júktemesin de azaıtady.
Naqty ýaqyt rejıminde qalyptasatyn analıtıkalyq derekter esep daıyndaý kezindegi qol eńbegin qysqartyp, adamı faktordyń yqpalyn tómendetedi.
– Bul basqarýshylyq sheshimderdi obektıvti derekter negizinde qabyldaýǵa múmkindik beredi, – delingen habarlamada.
Aldaǵy ýaqytta platformanyń fýnktsıonaly keńeıtiledi.
Júıege jer resýrstary, salyqtar, sýbsıdııalar, sondaı-aq sharýa jáne fermer qojalyqtarynyń qyzmetine qatysty derekter engiziledi.
Bul aýyldyq aýmaqtardy keshendi damytýǵa jáne óńirlerdegi basqarý tıimdiligin arttyrýǵa qosymsha múmkindik beredi.
Aıta keteıik, Qazaqstanda 183-shi «Aýyl qutqarýshylary» órtke qarsy beketi ashyldy.
