Ákimniń tsıfrlyq jumys orny engiziledi
ASTANA. KAZINFORM – Aýyldyq okrýgterde bıznesti damytýǵa arnalǵan jeke memlekettik baǵdarlama ázirleý orynsyz. Bul týraly Senat depýtattarynyń saýalyna Premer-mınıstr Oljas Bektenovtiń jaýabynda aıtylǵan.
- Zańdy tulǵalardyń múlkin qaıta baǵalaý jáne ákimdikterdiń memlekettik derekqorlarǵa qol jetkizýi bóliginde Salyq kodeksinde zańdy tulǵalardyń múlkine keminde úsh jylda bir ret qaıta baǵalaý júrgizý kózdelgenin habarlaımyz. Sonymen qatar memlekettik aqparattyq júıelerge qol jetkizýdi qamtamasyz etý úshin biryńǵaı «Ákimniń tsıfrlyq jumys ornyn» engizý jumystary júrgizilýde. Aýyldyq okrýgterde bıznesti damytýǵa arnalǵan jeke memlekettik baǵdarlama ázirleý usynysyna qatysty, aýyldyq aýmaqtardy memlekettik qoldaý sharalary qazirdiń ózinde qoldanystaǵy baǵdarlamalar men aýdandardyń besjyldyq damý josparlaryna ıntegratsııalanǵanyn atap ótemiz, osyǵan baılanysty jeke baǵdarlama ázirleý orynsyz,- dedi Premer-mınıstr.
Onyń aıtýynsha, óndirilgen ónimdi saqtaý jáne qaıta óńdeý ınfraqurylymyn damytý, shyǵyndardy azaıtý arqyly halyqtyń tabysyn arttyrý, logıstıkany jaqsartý jáne kásipkerlikti damytý maqsatynda «Ónerkásipti damytý qory» AQ-nyń memlekettik qoldaý quraldary paıdalanyla otyryp, Túrkistan jáne Qostanaı oblystarynyń aýyldyq aýmaqtarynda shaǵyn ónerkásiptik aımaqtar qurylǵan.
- Osyndaı shaǵyn ónerkásiptik aımaqtar qurý tájirıbesi elimizdiń basqa óńirlerinde de jalǵasatyn bolady. Sondaı-aq «Aýyl amanaty» jobasy sheńberinde mıkrokredıt berýdiń jańa tetikteri ázirlendi. Atap aıtqanda, ósirýden bastap ótkizgenge deıingi tolyq óndiristik tsıkldi qamtamasyz etetin qaıta óńdeý qyzmetin qoldaý, kooperatıvterge basym qoldaý kórsetý sııaqty negizgi basymdyqtar aıqyndaldy. Jalpy, «Aýyl amanaty» jobasy aıasynda 2026-2028 jyldarǵa arnalǵan respýblıkalyq bıýdjette 450 mlrd teńge bólý kózdelgen,- dedi Oljas Bektenov.
Buǵan deıin aýyldyq okrýgterdiń bıýdjetine jekelegen salyq túsimderin berý máselesi pysyqtalyp jatqanyn jazǵan edik.