Ákimge qaýip tóndi: Qostanaı oblysy basshysyna qatysty feık-vıdeo tarady

QOSTANAI. KAZINFORM – Qostanaı oblysynyń ákimdigi beıneniń jasandy ıntellekt arqyly jasalǵanyn habarlady.

Messendjerlerde Qostanaı oblysynyń ákimi Qumar Aqsaqalov beınelengen beınejazba tarady. Onda óńir basshysy ózine qaýip tóngenin málimdeıdi. Keıin bul beınejazbanyń feık, onyń jasandy ıntellekt tehnologııasyn qoldaný arqyly jasalǵany anyqtaldy. 

– Qostanaı oblysynyń ákimdigi jalǵan aqparat taratý faktisi boıynsha quqyq qorǵaý organdaryna aryzdandy. Vedomstvo feık jasaýǵa jáne taratýǵa qatysqandardyń barlyǵy anyqtalyp, zańnamaǵa sáıkes jaýapqa tartylatynyn málimdeıdi, - dep habarlady baspasóz qyzmeti. 

Aımaq turǵyndaryn arandatýshylyqqa berilmeýge, osyndaı materıaldardy ári qaraı taratpaýǵa jáne aqparatty tek resmı derekkózder arqyly tekserýge shaqyrady.

Buǵan deıin júrgizýshi kýáligin 10 sáýirge deıin aýystyrý qajettigi týraly jalǵan aqparat tarap jatqanyn jazyp, eskertken edik.