Ákimdikterge pedagog mártebesine qatysty talaptardy taǵy da túsindirý kerek - mınıstr

ASTANA. KAZINFORM – «Pedagog mártebesi týraly» zań qabyldanǵannan keıin pán muǵalimderiniń tapshylyǵy men olardyń jalaqysy máselesi sheshildi me? Bul suraqqa Oqý-aǵartý mınıstri Ǵanı Beısembaev jaýap berdi.

- Jalpy, muǵalimderdiń aılyǵy eki eseden astam ósti. Ony muǵalimderdiń ózderi de aıtyp júr. Ekinshiden, muǵalimderdiń quqyn qorǵaýǵa qatysty toqtalsaq, osydan 4-5 jyl burynǵy jaǵdaımen salystyrsaq, quqyq buzý derekteri birneshe ese azaıǵanyn aıtý kerek. Qazir ara-tura osyndaı jaǵdaı kezdesip jatady. Osyǵan qatysty óńirlerdegi ákimdik ókilderin qaıta jınap, pedagog mártebesine qatysty zańdy egjeı-tegjeıli túsindirý kerek. Sondyqtan bıyl tamyz aıynda osyny eskerip, taǵy da túsindiremiz, - dedi Ǵ.Beısembaev Parlament palatalarynyń birlesken otyrysynan keıin tilshiler suraǵyna jaýap bere otyryp.

Onyń aıtýynsha, qazir Oqý-aǵartý mınıstrligi Ǵylym jáne joǵary bilim mınıstrligimen birlese sapaly kadrlardy daıarlaýǵa qatysty jumys istep jatyr.

- Byltyrdyń ózinde 14 myń stýdent mektepte jumysqa qabyldandy, al suranys 8 myń bolǵan. Osy oraıda qazir jas muǵalimderdiń sany artty. Sondaı-aq zeınet jasyndaǵy myqty muǵalimder de bar, olardyń sany 5 paıyzdan az, - dedi mınıstr.

Budan buryn habarlanǵandaı, Ǵanı Beısembaev jekemenshik mektepterdegi kemshilikterdi joıýǵa qatysty tıisti erejeni qabyldaý josparlanyp otyrǵanyn aıtty. 

Aıta keteıik, muǵalimderdi artyq jumysqa tartý kúrt tómendegen.