Ákimdikterge ǵylymdy qarjylandyrý quqyǵy berilmek
ASTANA. KAZINFORM – Ákimdikterge ǵylymdy qarjylandyrý quqyǵy berilmek. Mundaı jańashyldyq «Qazaqstan Respýblıkasynyń keıbir zańnamalyq aktilerine ǵylym máseleleri boıynsha ózgerister men tolyqtyrýlar engizý týraly» zań jobasynda kózdelgen.
«Ákimdikterge ǵylymdy qarjylandyrý quqyǵyn berý usynylady. Zań jobasy aıasynda jergilikti atqarýshy organdardyń ǵylym jáne ǵylymı-tehnıkalyq qyzmet salasyndaǵy quzyretterin keńeıtýge qatysty mańyzdy jańalyq usynyldy. Mundaı sheshim óńirlerde ǵylymı áleýetti neǵurlym tıimdi paıdalanýǵa yqpal ete otyryp, ǵylymnyń damýyndaǵy óńirlik erekshelikter men qajettilikterdi barynsha eskerýge múmkindik beredi», - dedi zań jobasy týraly baıandama jasaǵan Áleýmettik-mádenı damý komıtetiniń tóraǵasy Ashat Aımaǵambetov.
Onyń atap ótýinshe, osyǵan oraı ákimdikter óńirlerdegi problemalardy sheshýde ǵylymı zertteýlerdi paıdalanýǵa múmkindik alady.
«Zań jobasyna "ǵylymı etıka" uǵymy engizilip otyr. Bul norma ǵylymı zertteýlerdiń sapasy men jaýapkershiligin arttyrýǵa, akademııalyq adaldyq qaǵadattaryn saqtaýǵa baǵyttalyp otyr», - dedi Májilis depýtaty.
