Ákimdikterdiń jumysy kóńil kónshitpeıdi - Bektenov asyl tuqymdy mal basyn kóbeıtý jaıynda
ASTANA. KAZINFORM – Mal sharýashylyǵyn damytýdyń keshendi jospary aıasynda jeńildetilgen nesıelerdiń maqsatty ári tıimdi ıgerilýin qamtamasyz etý qajet. Bul týraly búgin Úkimet otyrysynda Premer-mınıstr Oljas Bektenov aıtty.
- Bıyl astyq sapasy joǵary bolady dep kútiledi. Іshki jáne syrtqy astyq naryqtarynyń suranysyn qamtamasyz etý úshin egin oraǵyn ýaqtyly aıaqtaý mańyzdy. Óńir ákimdikteri Aýyl sharýashylyǵy mınıstrligimen birlesip, qolda bar elevatorlar men astyq qoımalaryn tolyq jumyldyrýy qajet, - dedi Premer-mınıstr.
Úkimet basshysynyń atap ótýinshe, mal sharýashylyǵynda paıdalanýǵa berilgen taýarly sút fermalary boıynsha sút óndirý kólemin osy jyldyń sońyna deıin jobalyq qýattyń keminde 70% deńgeıinde qamtamasyz etken jón.
- Maldyń genetıkalyq áleýetin jaqsartý úshin asyl tuqymdy mal basyn kóbeıtý mańyzdy. Ázirge, bul baǵytta ákimdikterdiń jumysy kóńil kónshitpeıdi. Óńir ákimdikterine Mal sharýashylyǵyn damytýdyń keshendi jospary aıasynda jeńildetilgen nesıelerdiń maqsatty ári tıimdi ıgerilýin qamtamasyz etýdi tapsyramyn, - dedi ol.
Premer-mınıstr birneshe aıdan beri sýsyndar óndirisiniń qarqyny tómendep ketkenine de nazar aýdardy.
- Aýyl sharýashylyǵy mınıstrligi ósimniń qosymsha rezervterin anyqtap, jaǵdaıdy turaqtandyrý boıynsha tıimdi sharalar qabyldasyn, - dedi Oljas Bektenov.
Buǵan deıin Premer-mınıstr Oljas Bektenov otandyq ónimdi shetel naryǵyna shyǵarýdaǵy kedergilerdi azaıtýdy tapsyrǵan edi.
