Ákimdikter jergilikti joldardyń sapasyn arttyrý josparyn ázirleıdi
ASTANA. KAZINFORM — Elimizdegi jergilikti joldardyń sapasyn arttyrý sharalary qaraldy, dep habarlaıdy Kólik mınıstrliginiń baspasóz qyzmeti.
QR Premer-mınıstriniń birinshi orynbasary Nurlybek Nálibaev Kólik mınıstrliginde Úkimet basshysy Oljas Abaıulynyń tapsyrmasyna sáıkes uıymdastyrylǵan «Sapaly joldar: josparlaýdan paıdalanýǵa deıin» taqyrybyndaǵy úsh kúndik respýblıkalyq semınar-keńestiń qorytyndy otyrysyna qatysty.
Atalǵan is-sharaǵa ortalyq memlekettik organdar, óńir basshylarynyń orynbasarlary, kompanııalar men uıymdardyń basshylary qatysty.
Jol sapasy máselesi Memleket basshysynyń turaqty nazarynda. Prezıdent Qasym-Jomart Toqaev jol ınfraqurylymyn damytý jumystarynyń naqty nátıjesine basa mán berý qajettigin atap ótken bolatyn. Bul rette jol sapasyna qoıylatyn talaptardy kúsheıtý jáne saladaǵy jaýapkershilikti arttyrý ózekti mindetterdiń biri bolyp qala beredi.
Іs-shara barysynda Premer-mınıstrdiń birinshi orynbasary oryndalatyn jumystardyń sapasyn baqylaýdy kúsheıtýdi, joldardyń buzylýyna jol bermeýge erekshe toqtaldy. Jergilikti atqarýshy organdar nysandardyń belgilengen talaptarǵa tolyq sáıkes bolǵan jaǵdaıda ǵana qabyldanýyn qamtamasyz etý qajettigin atap ótti.
— Kepildik merzimi ishinde aqaýlar anyqtalǵan jaǵdaıda, olardy merdigerler óz qarajaty esebinen joıýǵa tıis, — dedi Nurlybek Nálibaev.
Semınar barysynda jol jumystarynyń jekelegen kezeńderine ǵana emes, jergilikti jol jelisin basqarýdyń tutas júıesine basa nazar aýdaryldy. Basty tapsyrmalardyń biri — oblystar men respýblıkalyq mańyzy bar qalalardyń ákimdikterine bir apta ishinde jergilikti joldardyń sapasyn arttyrý jónindegi úsh jyldyq josparlardy ázirleýdi tapsyrdy. Josparlar jol jumystarynyń barlyq kezeńin qamtýy tıis. Atap aıtqanda, basym ýchaskelerdi aıqyndaý, jobalaý qujattamasyn ázirleý, qurylys jáne jóndeý jumystaryn júrgizý, olardyń sapasyn baqylaý, joldardy keıinnen kútip-ustaý máseleleri eskerilýi qajettiligine toqtalyp ótti.
Semınar qorytyndysy boıynsha respýblıkalyq, jergilikti mańyzy bar avtomobıl joldary jelisiniń sapasyn arttyrýǵa baǵyttalǵan naqty mindetter aıqyndaldy.
Buǵan deıin Túrkistanda jol qurylysy materıaldarynyń 50-den astam synamasy talapqa saı bolmaǵanyn jazǵanbyz.
