Ákimdikter janynan ǵylym men bıznesti yqpaldastyratyn keńester qurý kerek – Ulttyq keńes
ASTANA. KAZINFORM – Ulttyq ekonomıkany ındýstrııalandyrý úshin qabyldanyp jatqan sharalarǵa qaramastan, onyń shıkizattyq sıpaty asa ózgere qoıǵan joq. Bul týraly Aqordada ótip jatqan Ǵylym jáne tehnologııalar jónindegi ulttyq keńestiń otyrysynda Memleket basshysy Qasym-Jomart Toqaev aıtty.
Memleket basshysy ǵylym ekonomıkanyń qarqyndy damýyna septigin tıgizýge tıis ekenin atap ótti.
«Ulttyq ekonomıkany ındýstrııalandyrý úshin qabyldanyp jatqan sharalarǵa qaramastan, onyń shıkizattyq sıpaty asa ózgere qoıǵan joq. Úkimetke ekonomıkanyń jańa modelin qurý mindeti júkteldi. Qosylǵan qunnyń ornyqty tizbegi onyń negizine aınalýy kerek. Bul baǵytta munaı servısi men munaı hımııasy salalarynyń (plastık, kómirtekti nanotútiksheler, kómirtekti talshyqtar, grafen óndirisi) áleýeti zor. Keńestiń birinshi otyrysynda men Úkimetke ǵylymı ınstıtýttar men ýnıversıtetterdiń resýrstaryn jumyldyra otyryp, ǵylymnyń ashyq ári qoldanbaly modeline kóshý jónindegi keshendi sharalardy iske asyrýdy tapsyrǵan edim. Ǵylymı jobalarda akademııalyq suranystar ǵana emes, el damýynyń strategııalyq maqsattary men ekonomıkanyń qajettilikteri de eskerilýi kerek. Ol úshin úzdik halyqaralyq tájirıbege súıene otyryp, zertteýdiń naqty basymdyqtaryn aıqyndaý qajet»,-dedi Memleket basshysy.
Bul rette Prezıdente ǵylymı ázirlemelerdi kommertsııalandyrýdyń máni zor ekendigine toqtaldy. Mysaly, ǵalymdardyń zertteýlerin turǵyn úı-kommýnaldyq sharýashylyq salasyndaǵy shyǵyndardy azaıtý, resýrs únemdeıtin tehnologııalardy engizý, sondaı-aq klımattyq erekshelikterimizdi eskere otyryp, joldardy jóndeý jáne salý úshin paıdalanýǵa bolady. «Qarapaıym zattar týraly ǵylym» belsendi damýǵa tıis. Ol úshin ǵylymı qoǵamdastyq pen bıznes arasyndaǵy ózara yqpaldastyqtyń tıimdi tetikterin jolǵa qoıý qajet. Ákimdikter janynan osy baǵyttaǵy mindetterdi sheshýge yqpal etetin ǵylymı keńester qurǵan jón. Ǵylymı zertteýlerdiń nátıjelerin óndiriske keńinen engizý protsesine elimizdiń barlyq óńirindegi iri kásiporyndar tartylýǵa tıis.
«Búgingi kórmede men ǵalymdarymyzdyń ónimdi qaıta óńdeý deńgeıin arttyrýǵa qosqan naqty úlesin kórsetetin birqatar jobamen tanystym. Mundaı sátti tájirıbeni keńinen taratý kerek. Bul iske elimizdiń barlyq óńirindegi iri óndiris kompanııalarynyń qatysýy mańyzdy. Úkimet ǵylym salasyndaǵy shyǵyndarǵa salyqtyq jáne ınvestıtsııalyq jeńildikter berý arqyly bıznesti yntalandyrýdy jalǵastyrǵany jón»,-dedi Qasym-Jomart Toqaev.
