Ákimdikter talapkerlerge neshe bilim grantyn bóldi
ASTANA. KAZINFORM – Qazaqstanda jergilikti atqarýshy organdar bóletin memlekettik bilim berý granttaryn taǵaıyndaý konkýrsyna ótinish qabyldaý bastaldy. Bıyl ákimdikter bakalavrıat, magıstratýra jáne rezıdentýra baǵdarlamalary boıynsha barlyǵy 2392 bilim grantyn bóldi, dep habarlaıdy Ǵylym jáne joǵary bilim mınıstrligi.
Jyl saıyn ákimdikter óńirlerge qajetti jáne basym baǵyttar boıynsha mamandardy maqsatty daıarlaý úshin bilim berý granttaryn usynady.
– Bıyl jergilikti atqarýshy organdar bakalavrıat, magıstratýra jáne rezıdentýra baǵdarlamalary boıynsha oqýǵa 2392 bilim berý grantyn bóldi, – delingen mınıstrlik habarlamasynda.
Eń kóp grant Astana qalasynda qarastyrylǵan – 303. Shymkent qalasynyń ákimdigi 285, Shyǵys Qazaqstan oblysy 270 grant bóldi.
Batys Qazaqstan oblysynda – 211, Abaı jáne Túrkistan oblystarynda – 200-den, Aqmola oblysynda – 199, Qaraǵandy oblysynda – 198, Atyraý oblysynda – 187, Mańǵystaý oblysynda 163 grant qarastyrylǵan. Qalǵan óńirlerdiń árqaısysy 100-ge jýyq grant usyndy.
Konkýrsqa qatysý úshin talapkerler ózderi tańdaǵan joǵary oqý ornynyń qabyldaý komıssııasyna ótinish berýi kerek.
Ótinishke bilim týraly qujat, negizgi UBT sertıfıkaty, jeke basyn kýálandyratyn qujattyń kóshirmesi, sondaı-aq bar bolǵan jaǵdaıda jeńildik sanatyn rastaıtyn qujattar qosa tapsyrylady.
– Bilim berý granttaryn berý týraly sheshimdi tıisti ákimdik janynan qurylǵan arnaıy komıssııa qabyldaıdy. Qujattardy qabyldaý merzimi týraly aqparatty jergilikti atqarýshy organdardan jáne joǵary oqý oryndarynyń qabyldaý komıssııalarynan alýǵa bolady, – dep habarlady mınıstrlik.
Joǵary oqý oryndaryna qujat qabyldaý 25 tamyzǵa deıin jalǵasady.
