Ákimdikter derekterdi burmalaýǵa beıim – Agenttik resmı statıstıkanyń shynaıy jaǵdaımen sáıkespeıtinin aıtty
ASTANA. KAZINFORM – Strategııalyq josparlaý jáne reformalar agenttigi Kazinform saýalyna joldaǵan jaýabynda resmı statıstıkany qalyptastyrý kezinde múddeler qaqtyǵysy kezdesetinin málim etti.
«Degenmen, statıstıkada múddeler qaqtyǵysy bar ekenin joqqa shyǵara almaımyz. Sebebi jergilikti atqarýshy organdar ózderiniń eldi mekenderi nemese aımaǵynyń shynaıy statıstıkasyn burmalaýǵa, derekterdi joǵarylatýǵa, jasyrýǵa beıim. Sondyqtan, málimetterdiń dáldigi men senimdiligin qamtamasyz etý úshin bıýro qosymsha baqylaý tetikterin engizdi.
Máselen, 2023 jyly respondentterdiń bastapqy derekteri aýyl sharýashylyǵy janýarlaryn sáıkestendirý boıynsha veterınarııalyq qadaǵalaý jáne baqylaý komıteti derekterimen, egis alqaby boıynsha ǵaryshtan monıtorıngteý jáne sharýashylyq esep derekterimen sáıkestigi tekserildi. Baqylaý qorytyndysy boıynsha, tıisti organdarǵa buzýshylyqtardy joıý týraly qorytyndylar joldandy», - dep jazylǵan jaýapta.
Agenttiktegilerdiń paıymdaýynsha, bul qorytyndylar resmı statıstıkanyń sapasyn arttyrýǵa yqpal etedi.
«Bıýro óz qyzmetinde statıstıkalyq derekterdiń ashyqtyǵy men senimdiligin arttyrýǵa basymdyq beredi», - dep jazylǵan resmı málimette.
