Ákimdikter azyq-túlik taýarlarynyń úzdiksiz jetkizilýin qamtamasyz etýi tıis - AShM

ASTANA. KAZINFORM – Elimizde mal sharýashylyǵy ónimderiniń jetkilikti kólemi óndiriledi. Bul týraly Úkimet otyrysynda Aýyl sharýashylyǵy mınıstri Aıdarbek Saparov aıtty.

- Mal sharýashylyǵy ónimderiniń jetkilikti kólemin óndirip jatyrmyz. Sonymen, et ónimderi – sıyr, qoı, jylqy etteri jáne jumyrtqa ishki suranysty tolyǵymen jabady. Qus eti boıynsha oń dınamıka baıqalyp otyr. Eger ótken jyly qamtý deńgeıi 79 paıyz bolsa, bıyl 82 paıyzǵa jetti. Sút ónimderi boıynsha da qamtamasyz etilý 100 paıyzǵa jetkizildi, - dedi mınıstr.

Onyń aıtýynsha, qazirgi óndiris kólemi ishki naryqty qoljetimdi ónimdermen tolyq qamtamasyz etýge múmkindik beredi.

- Dál osy kezeńde ákimdikter qajetti kólemdi tek turaqtandyrý qorlary arqyly ǵana emes, sonymen qatar saýda úıleri arqyly da kelisimshartqa otyrǵyzyp, ónimniń úzdiksiz jetkizilýin qamtamasyz etýi qajet. Bul maqsatqa óńirlerde «aınalym shemasy» boıynsha 100 mlrd teńgeden astam qarajattary bar. Osy bólingen qarajatty tıimdi paıdalaný arqyly ishki naryqty qajetti azyq-túlik taýarlarymen turaqty qamtamasyz etip, baǵa turaqtylyǵyn saqtaýǵa qol jetkizýimiz qajet, - dedi Aıdarbek Saparov.

Aıta keteıik, bıyl boljam boıynsha 24 mln tonna astyq bastyrylady.