Ákimdikter avtogaz quıý stantsııalarynyń sanyn retteıdi — Jańa zań
ASTANA. KAZINFORM — 2030 jylǵa deıin gaz tutynatyn abonentter qashyqtan derek beretin «aqyldy» qurylǵylarymen qamtylady. Sondaı-aq ákimdikter avtogaz quıý stantsııalarynyń shekti sanyn belgilep, iri gaz tutynatyn nysandarǵa jańa talaptar engiziledi. Bul týraly senator Bıbigúl Aqqojına baıandady.
Búgin Senat otyrysynda «QR keıbir zańnamalyq aktilerine gazben jabdyqtaý jáne elektr energetıkasy máseleleri boıynsha ózgerister men tolyqtyrýlar engizý týraly» zań jobasy qaraldy.
Zańǵa sáıkes, ákimdikter suıytylǵan gazben júretin avtokólikter sany týraly derekter negizinde avtogaz quıý stantsııalarynyń (AGQS) shekti sanyn aıqyndaıtyn bolady.
— Qazirgi ýaqytta elimizde 3 myńnan astam AGQS jumys isteıdi. 2023 jylmen salystyrǵanda olardyń sany 3 esege artqan. Bul rette, zańdy túrde jumys istep turǵan jáne paıdalanýǵa berilgen barlyq AGQS óz qyzmetin qalypty rejımde jalǵastyrady, — dedi depýtat.
Taǵy bir mańyzdy jańashyldyq — taýarlyq gaz tutyný kóleminiń shekti deńgeıi boıynsha kommýnaldyq-turmystyq jáne ónerkásiptik tutynýshylar uǵymdaryn ajyratý.
— Qazirgi tańda keıbir kommýnaldyq-turmystyq tutynýshylar, mysaly, saýda-oıyn-saýyq ortalyqtary gazdy ónerkásiptik kólemde, onyń ishinde jerasty avtoturaqtaryn jylytý úshin paıdalanady. Osyǵan baılanysty tutynýshylardy gaz esepteý aspaptarynyń ótkizý qabiletine qaraı bólý qajettiligi týyndady, — dedi B. Aqqojına.
Sondaı-aq, zańda taýarlyq gazdy esepke alý aspaptaryna derekterdi qashyqtan berý múmkindigin qamtamasyz etý talaptardy jazylǵan.
— Búginde elimizde shamamen 2,8 mıllıon tutynýshy bar. Qazirgi ýaqytta olardyń tek 3,5% ǵana derekterdi qashyqtan berý fýnktsııasy bar esepke alý aspaptarymen qamtylǵan. Zań aıasynda 2030 jylǵa deıin abonentterdiń 100% «aqyldy» esepke alý aspaptarymen qamtý usynylady. Halyq úshin derekterdi qashyqtan berý fýnktsııasy gaz jetkizýshilerdiń qarajaty esebinen júzege asyrylady, — dedi senator.
Aıta keteıik, gazben jabdyqtaý jáne elektr energetıkasy máseleleri boıynsha zań jobasy eki oqylymda maquldandy.
