Ákimdikte kúzet kúsheıtilmeıdi — Sársen Quranbek

ShYMKENT. KAZINFORM — Kúdiktini polıtsııa qyzmetkerleri ustaǵan.

Shymkent qalasy ákiminiń orynbasary, resmı ókil Sársen Quranbek ákimdikte kúzettiń kúsheıtilmeıtindigin jetkizdi. 

— Qalaı boldy sol qalpynda qalady. Qalaı ómir súrdik, solaı ómir súre beremiz. Eshnárse ózgermeıdi, — dedi ol. 

Sondaı-aq, Rýslan Berdenovke oq atqan kúdiktini polıtsııa qyzmetkerleri ustaǵanyn jetkizdi. 

— Berdenovtiń júrgizýshisi kúdiktiniń ustalýyna áser etken bolsa kerek. Bul tergeý barysynda anyqtalatyn dúnıe. Kóligimen janap ótken bolýy kerek. Ustaýǵa kómektesken bolýy kerek. Biraq polıtsııa qyzmetkerleri ustaǵanyn aıtqym keledi, — dedi Sársen Quranbek. 

Aıta keteıik, Shymkentte qala ákiminiń orynbasary Rýslan Berdenovke qastandyq jasalǵan bolatyn. Kúdikti sheneýnikke qaraı úsh ret oq atqan. Oqıǵa saldarynan ákimdik qyzmetkeri jaraqat alyp, aýrýhanaǵa jetkizildi.

Al, dárigerler Rýslan Berdenovtiń ómirine qaýip tónip turmaǵanyn aıtty. Jasalǵan ota da sátti ótti.