Ákimdik «Turǵyn úı-Shymkent» JShS-de qarjy jymqyrý deregin rastamady
ShYMKENT. KAZINFORM — Qala ákiminiń orynbasary Rýslan Berdenovke jasalǵan qastandyqqa qatysty qylmystyq is pen turǵyn úılerge júrgizilgen kúrdeli jóndeý jumystary arasynda baılanys bary resmı túrde rastalǵan joq.
Áleýmettik jelilerde «Turǵyn úı Shymkent» JShS-niń burynǵy basshysy Ernar Jıembaı men qala ákiminiń orynbasary Rýslan Berdenov arasyndaǵy janjaldyń yqtımal sebepteri talqylanyp jatyr. Ákimdik mańyndaǵy oq atylýdan birneshe kún buryn ótken jınalysta odan turǵyn úılerdiń kúrdeli jóndeýine bólingen 3,4 mlrd teńgeniń qaıda jumsalǵanyn túsindirýdi talap etken degen nusqa belsendi taratylyp jatyr.
Alaıda advokattardyń aıtýynsha, tergeý barysynda Rýslan Berdenov Ernar Jıembaımen jumys babynda eshqandaı kelispeýshilik bolmaǵanyn málimdegen. Onyń aıtýynsha, ol tek tapsyrmalardyń oryndalý barysy men mindetterdiń bólinýine qyzyǵýshylyq tanytqan. Bul suraqtar qoıylǵan sátte tıisti tender aıaqtalyp, daýǵa sebep bolarlyq jaǵdaı bolmaǵan.
Kazinform saýalyna jaýap retinde ákimdik kompanııa qyzmetin tekserýdi surap, Іshki memlekettik aýdıt departamentine hat joldanǵanyn habarlady. Tekserý jumystary atqarylǵan isterdiń sapasyn, jobalyq-smetalyq qujattamaǵa sáıkestigin, sondaı-aq bıýdjet qarajatynyń maqsatty ári tıimdi jumsalýyn qamtıdy.
Atalǵan JShS-niń quryltaıshysy Shymkent qalasynyń ákimdigi ekendigin atap ótken jón.
Qarjylandyrý kólemi
TKSh jańǵyrtý baǵdarlamasy aıasynda 2023–2025 jyldary kompanııaǵa bólingen qarjy mólsheri:
• 2023 jyly — 1 mlrd teńge,
• 2024 jyly — 1,4 mlrd teńge,
• 2025 jyly — 1,9 mlrd teńge.
2024 jyly 15 kóppáterli úıdiń kúrdeli jóndeýi aıaqtaldy, 10-nan astam nysanda jumys jalǵasyp jatyr. Bıyl jalpy 22 úıdi jańartý josparlanǵan.
Baqylaý qalaı júzege asyrylady
Qoldanystaǵy júıege sáıkes, kúrdeli jóndeýge merdigerlerdi tańdaý úı keńesteriniń qatysýymen úshjaqty kelisimshart negizinde júzege asyrylady.
— Budan bólek, úı keńesteri istelgen jumystardy qabyldaýǵa qatysyp, nysandy paıdalanýǵa berý aktilerine qol qoıady. Sebebi bólingen barlyq qarajat — qaıtarymdy qarjy, ony keıin turǵyndar ózderi óteýi tıis. Bıýdjet qarajaty tek maqsatty túrde jumsalyp, ashyqtyq pen qarjylyq eseptilik qaǵıdattary qatań saqtalady, — dep habarlady ákimdik.
Qarajattyń maqsatty jumsalýyna «Turǵyn úı Shymkent» JShS basshylyǵy da, qalalyq qurylys basqarmasy da jaýap beredi.
Kompanııanyń memlekettik satyp alýlarǵa qatysýy toqtatyla ma?
Ákimdik «Turǵyn úı Shymkent» JShS-men kelisimsharttardy birjaqty buzý máselesi qarastyrylmaıtynyn málimdedi. Barlyq merdiger buryn jasalǵan kelisimder boıynsha jumystaryn jalǵastyra beredi.
— Merdigerlerdi tańdaý Indýstrııa jáne ınfraqurylymdyq damý mınıstriniń 2020 jylǵy 29 sáýirdegi № 246 buıryǵyna sáıkes júzege asyrylady. Kelisimshart úı keńesi tańdaǵan uıymmen jasalady, al jumystardy qabyldaý mindetti túrde turǵyndardyń qatysýymen júrgiziledi, — dep tolyqtyrdy vedomstvo.
Aıta keteıik, budan buryn Shymkentte qala ákimniń orynbasary Rýslan Berdenovke jasalǵan qastandyqqa qatysty sot otyrysy ótkenin jazǵan bolatynbyz.
Ernar Jıembaı Rýslan Berdenovke qastandyq jasaý isi boıynsha jaýap berdi.