Ákimdik Merkidegi balalardyń jappaı ýlaný faktisine qatysty túsinikteme berdi

ASTANA. KAZINFORM — Merkidegi demalys ornyndaǵy balalardyń ýlaný oqıǵasyna qatysty resmı aqparat jarııalandy, dep habarlaıdy Jambyl oblysy ákimdiginiń baspasóz qyzmeti.

— 2026 jylǵy 21 qańtar kúni saǵat 22:40 shamasynda Merki aýdandyq kópbeıindi ortalyq aýrýhanasyna «Turan» demalys ornynan Qyzylorda oblysynan aýdanǵa kúres túrinen oqý-jattyǵý jıynyna kelgen 12–17 jas aralyǵyndaǵy 22 kámeletke tolmaǵan jasóspirim jetkizildi. Aldyn ala dıagnoz — etıologııasy anyqtalmaǵan gastroenterıt, — delingen habarlamada.

Aýrýdyń sebepterin anyqtaý maqsatynda naýqastardan jáne taǵam ónimderinen zerthanalyq saraptamalar alynǵan, qazirgi tańda qorytyndysy daıyndalyp jatyr. Atalǵan jaǵdaı boıynsha oblystyq sanıtarııalyq-epıdemıologııalyq baqylaý departamenti tıisti tekserý jumystaryn júrgizip jatyr.

Sonymen qatar bul fakti 2026 jylǵy 21 qańtarda Merki aýdandyq polıtsııa bóliminde tirkelip, quzyrly organnyń tekserý qorytyndysy negizinde tıisti protsestik sheshim qabyldanatyn bolady. Oblys ákimi Erbol Qarashókeevtiń tapsyrmasyna sáıkes oqıǵa ornyna oblys ákiminiń orynbasarlary Aıjan Esmaǵambetova men Serik Sálemov baryp, jedel shtab otyrysyn ótkizdi.

Balalar medıtsınalyq baqylaýǵa alynǵan, tıisti organdar tarapynan barlyq qajetti shara qabyldanýyp jatyr.

— Aıta keteıik, atalǵan demalys ornynda barlyǵy 103 jas sportshy men 13 jattyqtyrýshy qonystanǵan. Aýrýhanaǵa júgingen naýqastardyń jaǵdaıy jeńil dárejede, densaýlyqtary qalypty, dárigerlerdiń turaqty baqylaýynda. Demalys ornyndaǵy basqa balalarǵa medıtsınalyq tekserý júrgizildi, aýrý belgileri anyqtalǵan joq, profılaktıkalyq sharalar jalǵasyp jatyr, — delingen habarlamada.

Budan buryn Jambyl oblysyndaǵy balalardyń jappaı ýlaný isi tergelip jatqanyn jazǵan edik.