Ákimdik Qonaevta aıaqtalmaǵan jumysqa 12 mlrd teńge tólengenin joqqa shyǵardy

QONAEV.KAZINFORM - Áleýmettik jelide Qonaevtaǵy káriz-sorǵy stantsııalarynyń qurylysy keshiktirilip jatqany jáne merdigerge 12 mlrd teńgeden astam aqsha tólenip qoıǵany týraly aqparat tarady.

Jelidegi málimetpen birge keıbir sorǵy stantsııalary káriz sýlaryna tolyp ketkeni kórsetilgen beınejazba jarııalandy. Osyǵan baılanysty Qonaev qalasynyń ákimdigi málimdeme jasady.

Qala ákimdiginiń málimetine sáıkes, 2023 jyldyń qazan aıynda Qonaev qalasynda 11 káriz-sorǵy stantsııalaryn jańartý jumystary bastaldy. Bul joba qalalyq ınfraqurylymdy damytý maqsatynda qolǵa alynǵan. Merdiger «TOLAGAI-2050» kompanııasymen kelisimshartqa qol qoıylǵan.

- Jumys kestesine sáıkes, nysan 2025 jyldyń naýryzynda qoldanysqa beriledi dep kózdelgen. Qurylys jumystarynyń ýaqytyly júrýi qala ákimi Ashat Berdihanovtyń jeke baqylaýynda.

Ulttyq qordan bólingen 12 mlrd 687 myń teńgeniń 391 mln teńgeden astamy áli ıgerilmegen, merdigerdiń shotyna jiberilmegen, - dep habarlady ákimdikten.

Sondaı-aq Qonaev ákimdiginiń málimetinshe, qazirgi tańda jalpy 22 dana sorǵynyń jartysynan kóbi ornatylǵan jáne elektr jelileri tartylǵan. 28 shaqyrymnan astam qubyrdyń 26,5 shaqyrymy júrgizilgen.

- Bólingen qarjynyń somasy – qurylys materıaldarynyń qymbat bolýyna baılanysty. 1 káriz sorǵysynyń quny - 50-60 mıllıon teńge. Al 11 sorǵy stantsııasyna kem degende 2-3 danadan qoıý qajet. Budan bólek, qubyrlardy tartý, jerdi jarý, mamandardyń eńbekaqysy, qurylys materıaldaryn satyp alý degen sııaqty jumystary taǵy bar, - dep atap ótti Qonaev ákimdiginiń baspasóz qyzmeti.

Qala basshylyǵynyń baspasóz qyzmeti áleýmettik jelidegi beınejazbaǵa kóriniske de jaýap berdi.

- Vıdeolarda keıbir sorǵy stantsııalary káriz sýlaryna tolyp ketkeni kórsetilgen. Bul apattar birden joıyldy. Qazir 11 sorǵy stantsııasy qalypty jaǵdaıda jumys isteýde. Búginde basqa da ǵımarattardy, turǵyn úılerdi káriz sýy alyp ketý qaýpi joq, - dep málimdedi Almaty oblysynyń ákimshilik ortalyǵynan.

Eske salaıyq, buǵan deıin Qonaev sotynyń tóraǵasy sottalǵanyn jazǵanbyz.