Ákimdik granttaryna qujat qabyldaý bastaldy
ASTANA. KAZINFORM — Jergilikti atqarýshy organdar bóletin memlekettik bilim berý granttaryn taǵaıyndaý konkýrsyna qatysý úshin ótinishter qabyldaý bastaldy.
Jyl saıyn ákimdikter óńirler úshin suranysqa ıe jáne basym baǵyttar boıynsha kadrlardy maqsatty daıarlaýǵa bilim berý granttaryn bóledi.
Bıyl jergilikti atqarýshy organdar (bakalavrıat, magıstratýra, rezıdentýra baǵdarlamalary boıynsha) oqýǵa 2392 bilim berý grantyn bóldi.
— Eń kóp grantty Astana qalasynyń ákimdigi — 303, Shymkent qalasy — 285 grant, Shyǵys Qazaqstan oblysy — 270 granttan bóldi. Odan keıin Batys Qazaqstan oblysy — 211 grant, Abaı oblysy men Túrkistan oblysy — 200 granttan, Aqmola oblysy — 199 grant, Qaraǵandy oblysy — 198 grant, Atyraý oblysy — 187 grant, Mańǵystaý oblysy — 163 grant bóldi. Qalǵan óńirlerdiń árqaısysy 100-ge jýyq grant usyndy, — delingen habarlamada.
Konkýrsqa qatysý úshin talapkerler ózderi tańdaǵan joǵary oqý ornynyń qabyldaý komıssııasyna ótinish berýi qajet. Ótinishke bilim týraly qujat, negizgi UBT sertıfıkaty, jeke basyn kýálandyratyn qujattyń kóshirmesi, sondaı-aq jeńildik sanatyn rastaıtyn qujattar (bar bolǵan jaǵdaıda) qosa tapsyrylady.
Qujattardy qabyldaý merzimi týraly aqparatty jergilikti atqarýshy organdardan jáne joǵary oqý oryndarynyń qabyldaý komıssııalarynan alýǵa bolady. Bilim berý granttaryn berý týraly sheshimdi tıisti ákimdik janynan qurylǵan arnaıy komıssııa qabyldaıdy.
Joǵary oqý oryndaryna qujat qabyldaý 25 tamyzǵa deıin jalǵasady.
Aıta ketelik bilim granty ıegerleriniń tizimi shyqqan edi.
