Ákimderge avtoturaqtardy uıymdastyrý quzyreti berilmek
ASTANA. KAZINFORM — Ákimderge avtoturaqtardy uıymdastyrý jáne olardyń sanattaryn aıqyndaý qaǵıdalaryn bekitý quzyreti berilmek. Bul jaıynda Májilis depýtattarynyń saýalyna Premer-Mınıstrdiń birinshi orynbasary Roman Sklıardyń jaýabynda aıtylǵan.
«Qazirgi ýaqytta avtoturaqtardy (avtomobıl qoıatyn oryndardy) uıymdastyrý tártibi Almaty jáne Astana qalasy aýmaǵynda ǵana ákimderdiń qaýlylarymen bekitilgen. Qaǵıdalarǵa oraı avtoturaqtardy (avtomobıl qoıatyn oryndardy) uıymdastyrý jáne paıdalaný qurylys normalarynyń, órt qaýipsizdigi salasyndaǵy tehnıkalyq reglamentterdiń, sanıtarııalyq jáne ekologııalyq normalardyń talaptaryna sáıkes, sondaı-aq jer ýchaskesiniń nysanaly maqsatyn saqtaı otyryp júzege asyrylady. Astana qalasy ákimdiginiń aqparatyna sáıkes, aqyly kommýnaldyq avtoturaqtar qalanyń ortalyq aýdandarynda, halyq tyǵyz shoǵyrlanǵan núkteleri kólik toraptarynda, saýda oıyn-saýyq ortalyqtarynda, ákimshilik keshenderde jáne taǵy da basqa jerlerde ornalasqan», — dedi birinshi vıtse-premer jaýabynda.
Onyń atap ótýinshe, elordanyń shekaralas aýdandarynda jáne áleýmettik mańyzy bar obektilerde (aýrýhana, emhana, mektep, balabaqsha jáne t. b.) jáne turǵyn úılerdiń aýlalarynda aqyly kommýnaldyq avtoturaqtar joq. Aqyly kommýnaldyq avtoturaqtarǵa irgeles ornalasqan úılerdiń turǵyndaryna tegin turaq quqyǵyn beretin rezıdenttik abonementter beriledi.
«Almaty qalasy ákimdiginiń aqparatyna sáıkes aqyly kommýnaldyq avtoturaqtar qalanyń tarıhı iskerlik ortalyǵynda, sondaı-aq kórikti jerlerge jaqyn aýmaqta ornalasqan. Sonymen qatar Shymkent qalasynda jáne basqa oblystarda avtoturaq (avtomobıl qoıatyn oryndardy) uıymdastyrý tártibin retteıtin normatıvtik-quqyqtyq akt joq. Osyǵan oraı, qazirgi ýaqytta Májiliste qaralyp jatqan astananyń jáne respýblıkalyq qalalardyń damýy máseleleri boıynsha zań jobasy aıasynda oblys, respýblıkalyq mańyzy bar qalalardyń ákimderin avtoturaqtardy (avtomobıl qoıatyn oryndardy, parkıngterdi) uıymdastyrý jáne olardyń sanattaryn aıqyndaý qaǵıdalaryn bekitý quzyretin berý bóliginde zańnamalyq túzetýler engizý kózdelgen», — dedi Roman Sklıar.
Buǵan deıin «jol qozǵalysyndaǵy quqyq buzýshylyqtar avtomatty túrde anyqtalatyn buzýshylyqtar tizbesinen alyna ma» degen saýalǵa jaýap alǵan edik.