Ákimder jeke baqylaýyna alsyn – Premer-mınıstr jylytý maýsymyna daıyn emes óńirlerdi synady

ASTANA. KAZINFORM – QR Premer-mınıstriniń birinshi orynbasary Roman Sklıar jylytý maýsymyna daıyndyq týraly Úkimette esep berdi.

– Sońǵy aptada 1 qazandyq pen 3 týrbınada jóndeý jumystary aıaqtaldy. Qosymsha 10 qosalqy stantsııa men 100 taratý pýnktine jóndeý jumystary júrgizildi. Sondaı-aq, 13 shaqyrym jylý jelilerine rekonstrýktsııa jasaldy, – dedi R.Sklıar.

Jalpy, kestege sáıkes 6 energoblokta, 29 qazandyqta jáne 16 týrbınada jóndeý júrgizilgen. Jylýmen jabdyqtaý jelilerinde josparlanǵan jumystar 323 shaqyrymnyń 293 shaqyrymynda aıaqtaldy.

– Ótken Úkimet otyrysynan bastap Stepnogorsk qalasynda jylý jelilerindegi barlyq jumys aıaqtaldy. Sondaı-aq, Aıagózde jylytý maýsymyn bastaý úshin qajetti jumystar tolyq aıaqtaldy. Oral qalasynda ótken aptada jumystar taǵy 20%-ǵa aıaqtaldy, jalpy progress 85%. Barlyq jóndeý jumystaryn 15 qazanǵa deıin aıaqtaý josparlanǵan, – dedi Premer-mınıstrdiń birinshi orynbasary.

Sonymen qatar, Aıagózdiń Ortalyq qazandyǵynda №3 qazandyqty jóndeý aıaqtaldy, №2 qazandyqtyń daıyndyǵy 70% jáne №1 qazandyqtyń daıyndyǵy 20% bolyp otyr.

– Sátbaev qalasynda №2 qazandyqqa jóndeý jumystary aıaqtaldy. Oǵan qosymsha 30 qyrkúıekke deıin №1 qazandyq daıyn bolady. №3 qazandyqta jumys 82%, al №4 qazandyqta 48% oryndaldy, – dedi R.Sklıar.

Óz kezeginde Oljas Bektenov ákimderge jóndeý jumystaryn jeke baqylaýǵa alýdy tapsyrdy.

– Birqatar óńirde jumys áli aıaqtalmaǵan. Keıbir oblystarda sanaýly kúnderden keıin jylytý maýsymy bastalady. Sondyqtan ákimderge jóndeý jumystaryn aıaqtaýdy jeke baqylaýǵa alýdy tapsyramyn. Ásirese Oral, Stepnogorsk, Aıagóz, Sátpaev qalalarynda jylý berý máselesin erekshe nazarda ustańyzdar, – dedi Premer-Mınıstr.

Aıta keteıik, Petropavlda 24 qyrkúıekte jylytý maýsymy bastalady.