Ákimder saılaýy: Batys Qazaqstanda úsh aýdanda 28 myńnan astam saılaýshy tirkelgen
Saılaýshylardyń Konstıtýtsııalyq quqyǵyn júzege asyrýda usaq-túıek bolmaýy kerek. Bul týraly 5 qarashada ótetin aýdan ákimderin saılaýǵa daıyndyq barysynda Batys Qazaqstan oblysynda bolǵan Ortalyq saılaý komıssııasynyń múshesi Shavhat Ótemisov málim etti, dep habarlaıdy Kazinform.
Shavhat Ánesuly jumys sapary kezinde ákimder saılanatyn Qaratóbe, Bókeı ordasy jáne Tasqala aýdanynda boldy.
Ár aýdanda ákimdik laýazymyna úsh úmitkerden tirkelgeni málim. Qazirgi ýaqytta kandıdattar men senimdi ókilder úgit jumystaryn belsendi júrgizýde.
Qaratóbe aýdanyndaǵy saılaýshylar sany – 8 780 adam. Saılaýǵa daıyndyq barysymen tanysqan Ortalyq saılaý komıssııasynyń múshesi, ásirese, saılaý komıssııalary ornalasqan meken-jaılardy rezervtik jaryq kózi jáne sapaly telefon, ınternet baılanysymen qamtýdy, saılaý ýchaskelerine taktıldi baǵyttaǵyshtar, mnemoshemalar belgiler ornatýdy tııanaqtaýdy tapsyrdy. Saıası naýqandy qoldanystaǵy zańnama aıasynda saýatty da taza júrgizýdiń mańyzyn erekshe atap ótti.
Bókeı ordasynda aýdan ákiminiń mindetin atqarýshy Birjan Meńeshov saılaýshylar tizimindegi 9 141 adamnyń daýys berýine tolyq jaǵdaı jasalǵanyn jetkizdi.
Bókeı ordasy aýdandyq aýmaqtyq saılaý komıssııasynyń tóraǵasy Nurken Sabyrov saılaýǵa 147 komıssııa múshesiniń jumyldyrylǵanyn aıtyp ótti. Degenmen aýdanda 500-den astam qystaq bar. Sony eskere otyryp, shalǵaıda ornalasqan 13 ýchaskelik saılaý komıssııasy quramy 5 adamnan 7 adamǵa deıin kóbeıtildi. QR OSK múshesi ýákiletti organdardyń ókilderimen birge osy qystaqtardy aralap shyǵyp, saılaýshylar tizimin taǵy da pysyqtaý kerektigin aıtty.
Tasqala aýdany boıynsha saılaýshylar tizimine 10 963 adamnyń aty-jóni engizilgen.
Aýdan ákiminiń mindetin atqarýshy Aıan Halaýedın rezervtik elektr qýaty men ınternetten irkilis bolmaıdy dep sendirdi. Ár aýyldyq okrýg boıynsha qujattyq tirkeýdegi stýdentter men vahtalyq ádispen eńbek etetinderdiń tizimi naqtylanǵan. Sondaı-aq aýdan ishinde esepten shyǵarý kýáligi arqyly daýys beremin degen saılaýshylarǵa da barlyq múmkindik bar. Múmkindigi shekteýli jandarǵa ınvataksı qyzmeti usynylady. Saılaý bolatyn kúni Tasqala aýylynda marshrýttyq avtobýstar turǵyndardy tegin tasymaldaıdy. BQO aýmaqtyq saılaý komıssııasynyń tóraǵasy Ǵaısa Qapaqov avtobýstardyń júrý kestesi men ýaqytyn aýdandyq gazette aldyn ala jarııalaý kerektigin eskertti.
«Bizdiń basty mindetimiz – saılaýdy taza jáne ádil ótkizý. Saılaý úrdisterine tartylǵan árbir adam komıssııa jumysynyń ashyqtyǵyna, bizdiń is-áreketimizdiń zań sheńberinde bolǵanyna kózin jetkizýi kerek» dedi Shavhat Ótemisov.
Úsh aýdandy qosa alǵanda, barlyǵy 28 614 saılaýshy tirkelgen. Bókeı ordasynda 22, Qaratóbede 19, Tasqala aýdanynda 22 ýchaskelik saılaý komıssııasy jumys isteýde.
Eske sala keteıik, budan buryn BQO-da úsh aýdanda ákim saılaýyna 9 úmitker tirkelgenin jazǵan bolatynbyz.
