«Ákimder mektebi»: saılanǵan aýyl jáne aýdan basshylaryn oqytý bastaldy
ASTANA. KAZINFORM – Elimizde saılanǵan aýdandyq mańyzy bar qalalardyń, aýyldardyń, kentterdiń, aýyldyq okrýg ákimderiniń biliktiligin arttyrý baǵdarlamasy bastaldy.
– Arnaıy baǵdarlama jergilikti basqarý mindetterin tıimdi oryndaý, aýyl halqynyń ómir sapasyn jaqsartý, ınfraqurylymdy damytý úshin qajetti negizgi qabiletterdi damytýǵa arnalǵan. Baǵdarlama onlaın jáne offlaın formatynda 240 saǵattan turatyn 17 modýlden quralǵan. Onyń 100 saǵatyn AMANAT partııasynyń Saıası menedjment akademııasy júrgizedi. Baǵdarlamany jasaqtaý kezinde QR Ulttyq ekonomıka mınıstrligimen birlesip jumys istedik. Kýrs QR Strategııalyq jáne baǵdarlamalaý qujattaryn, jergilikti ózin-ózi basqarý salasyndaǵy qazirgi reformalardy, sondaı-aq bıýdjetteý jáne resýrstardy basqarý máselelerin zerdeleýdi qamtıdy, - dedi QR Prezıdentiniń janyndaǵy Memlekettik basqarý akademııasynyń rektory Erlan Ábil Memlekettik qyzmet isteri agenttiginde ótken jıynda.
Onyń aıtýynsha, oqytý 17 aqpan men 13 mamyr aralyǵynda ár oblystaǵy Memlekettik basqarý akademııasynyń fılıaldary bazasynda ótedi. Al kýrs sońynda qatysýshylar ózderiniń aýyldyq okrýgterin damytý boıynsha baǵdarlamalaryn usynatyn bolady.
Buǵan deıin Memleket basshysy «Ákimder mektebi» jobasyn iske qosýdy tapsyrǵan edi.
Sondaı-aq «Ákimder mektebi» jobasy 2 400-den astam aýdandyq jáne aýyldyq okrýg ákimderin qamtıtynyn jazǵan edik.