Aqmaral Naýatbek paradzıýdodan Gran-prı jarysynda jeńimpaz atandy

NUR-SULTAN. QazAqparat – Elordadaǵy Jaqsylyq Úshkempirov atyndaǵy jekpe-jek sport saraıynda paradzıýdodan Gran-prı jarysy márege jetti, dep habarlaıdy QazAqparat tilshisi.

Qazaqstan dzıýdo federatsııasynyń baspasóz qyzmetinen málim etkendeı, álemdik deńgeıdegi jarys Mádenıet jáne sport mınıstrligi, Ný-Sultan qalasy ákimdiginiń jáne «Sport Qory» sportty qoldaý qorynyń qoldaýymen uıymdastyryldy.

Eki kúnge sozylǵan aıtýly dodaǵa 22 elden 201 sportshy qatysyp, baq synady.

Qazaqstan quramasy 1 altyn, 2 kúmis jáne 3 qola medalmen jalpykomandalyq esepte Brazılııa, Túrkııa jáne Iran elderinen keıin tórtinshi orynǵa taban tiredi.

Paradzıýdodan jarysqa qatysatyn sportshylardyń eki sanaty bolady – J1 jáne J2. Birinshi sanaty – zaǵıp sportshylar, ekinshisi – kózi nashar kóretinder.

Alǵashqy kúni J2 sanaty boıynsha 48 keli salmaq dárejesinde elordalyq Aqmaral Naýatbek jeńiske jetti. Aqmaral barlyq qarsylasyn ıpponmen jeńdi.

Bul – onyń paralımpıadalyq dzıýdodan birinshi halyqaralyq jarysy.

A.Naýatbek ótken jylǵa deıin dzıýdo boıynsha kúresip, el namysyn álemdik arenada abyroımen qorǵap júrdi.

Áıtkenmen 2021 jyly jańa maýsym qarsańynda medıtsınalyq baqylaýdan ótkende, mamandar kóziniń nashar kóretinin jáne dzıýdo básekesine jiberilmeıtinin jetkizip, sport mansabyn para boıynsha jalǵastyrýǵa keńes bergen.

Jyl basynda ol Qazaqstan chempıonatynda qarsylas shaq keltirmegen edi. Gran-prı aldynda IBSA mamandary taǵy da tekseris júrgizip, 2 jyl paradzıýdodada kúresýge ruqsat bergen.

Osy Gran-prı básekesinde jeńimpaz, júldegerlerge dzıýdodaǵydaı reıtıngtik upaılar úlestiriledi. Sóıtip, Aqmaral paradzıýdodan alǵashqy álemdik jeńisine qol jetkizdi.

«Endi kelesi tekserý Parıj paralımpıadasy qarsańynda bolady» deıdi sportshy.

Sondaı-aq Erǵalı Shámeı 73 kg (J1) jáne Oljas Orazaly 73 kg (J2) salmaqta kúmis, Daıana Fedosova (57 kg, J2) qola medalǵa ıe boldy.

Jarystyń ekinshi kúninde birden 5 qazaqstandyq sportshy, atap aıtqanda, Janbota Amanjol (90 kg, J2), Dýlat Bógenbaev (+90 kg, J2), Baýyrjan Arystanbekov (90 kg, J1), Erlan Ótepov (+90 kg, J1), Erlan Qonkıev (+90 kg, J2) qola júlde úshin kúresti. Osylardyń ishinen J.Amanjol men B.Arystanbekov qana úzdik úshtikke ilikti.

Aıta keteıik, Tokıo paralımpıadasynda qazaqstandyq paradzıýdoshylar úsh kúmis júldeni jeńip alǵan bolatyn.