Aqmaral Erekesheva kórkem gımnastıkadan Azııa chempıonatynda qolaǵa qol jetkizdi
ASTANA. KAZINFORM - Búgin Bishkekte (Qyrǵyzstan) kórkem gımnastıkadan Azııa chempıonatynyń aqtyq jarystary ótip jatyr, dep habarlaıdy QR Týrızm jáne sport mınıstrligi Sportty damytý dırektsııasynyń baspasóz qyzmeti.
Jasóspirimder arasyndaǵy eki dúrkin álem chempıony, otandasymyz Aqmaral Erekesheva shyǵyrshyq jattyǵýynyń fınalynda 28.50 upaı alyp úzdik úshtikke endi. Osy saıysta 2022 jylǵy Azııa oıyndarynyń chempıony, ózbekstandyq tájirıbeli sportshy Tahmına Ikromova (29.25) jeńimpaz atansa, kúmis júldeni qytaılyq, 2024 jylǵy Olımpıada oıyndarynyń fınalısi Van Tszylý (28.90) aldy.
Aıta keteıik, sary qurlyq dodasyna jekeleı syn boıynsha 17 elden 30-dan astam úzdik sportshy qatysýda. Sondaı-aq bul týrnır kúzde Japonııada ótetin Azııa oıyndaryna daıyndyq kezeńderiniń biri sanalady.
Osyǵan deıin Qazaqstan quramasy kórkem gımnastıkadan Azııa chempıonatynda taǵy bir kúmis alǵany týraly jazǵan edik.
