Aqmaral Álnazarova: Ulttyq jobadan 16,5 mlrd teńgeni únemdedik

ASTANA. KAZINFORM – Densaýlyq saqtaý mınıstrligi «Aýyldaǵy densaýlyq saqtaý júıesin jańǵyrtý» ulttyq pılottyq jobasyn iske asyrý kezinde bıýdjettiń 16,5 mlrd teńgesin únemdep qalǵan. Bul týraly Aqmaral Álnazarova Úkimet otyrysynda málim etti.

Joba aıasynda aýyldyq eldi mekenderde 655 medıtsınalyq-sanıtarııalyq alǵashqy kómek kórsetý uıymyn ashý josparlanǵan bolatyn. Búginde sonyń 467-si salynyp bitken. Qalǵan 188 nysannyń qurylysy bıyl aıaqtalýy kerek.

- Jobalaý kezinde etalondyq jobalardy qaıta qoldaný arqasynda 2 mlrd teńge, al qurylys jumystary kezinde 14,5 mlrd teńge shamasynda bıýdjet qarajaty únemdeldi.

Bul nysandardyń qurylysy kezinde qoldanylǵan zattardyń 71%-y jergilikti ónim óndirýshilerdiń úlesine tıesili, - dedi vedomstvo basshysy.

Aqmaral Álnazarova atalǵan jańa nysandarǵa 143 medıtsına qyzmetkeri kerek bolatynyn atap ótti.

- Óńirlerdiń ákimdikteri qazirden bastap aýylǵa jańadan keletin mamandardy tartý jáne olardy ustap qalý boıynsha tıisti jumystardy bastaýlary qajet. 

655 nysannyń qurylysy aıaqtalyp, iske qosylǵan kezde shamamen 1 mıllıonǵa jýyq aýyl turǵyny qoljetimdi medıtsınalyq-sanıtarlyq alǵashqy kómekpen qamtylady, - dedi ol.

Buǵan deıin Pavlodar aýyldarynda qaıtarylǵan aktıvter esebinen ambýlatorııalar salynatynyn jazǵan edik.