Aqmaral Álnazarova Tashkentte aýrýhanaǵa túsken qaraǵandylyq balalarǵa qatysty túsinik berdi

— Osy jaǵdaı boıynsha birden Qazaqstannyń Ózbekstandaǵy elshisi Eraly Toǵjanovpen baılanysqa shyqtyq. Balalardyń densaýlyq jaǵdaıyn bizdiń vedomstvo baqylaýda ustap tur. Olardyń alyp jatqan em-domy elimizdiń hattamasyna sáıkes keledi. Qazir sportshylardyń jaǵdaıy turaqty. Búgin vıtse-mınıstr onlaın rejımde konferentsııa ótkizip, ár balanyń densaýlyǵyna qatysty aqparat aldy, — dedi Aqmaral Álnazarova Úkimet otyrysynan keıin tilshiler suraǵyna jaýap bere otyryp.

Onyń aıtýynsha, dál qazir jas sportshylardy Qazaqstanǵa tasymaldaý máselesi kóterilip jatqan joq.

— Bul máselese kóterilse, buǵan daıynbyz. Osy aqparat shyqqan boıda, Shymkent qalasy men Túrkistan oblysyndaǵy aýrýhanalarda tıisti oryn jasaqtalǵan edi. Qajet dári-dármek pen dárigerler de bar. Balalar tamaqtan ýlanǵan. Buǵan qatysty kórshi elde qosymsha zertteý júrip jatyr. Qazir balalardyń ómirine eshqandaı qaýip joq, — dedi mınıstr.

Buǵan deıin habarlanǵandaı, Tashkentte ótip jatqan Dostlik Cup 2026 halyqaralyq fýtbol festıvaline qatysqan birneshe jas fýtbolshynyń densaýlyǵy kúrt nasharlap, aýrýhanaǵa jatqyzyldy. Balalardyń ata-analary jappaı syrqattanýdy sportshylar turǵan qonaqúıdegi tamaqtyń sapasymen baılanystyrady. 

2 qarashadaǵy málimetke qaraǵanda aýrýhanaǵa túsken qazaqstandyq jas fýtbolshylardyń basym bóligi elge qaıtyp jatyr. Sońǵy málimetke sáıkes, Ózbekstan astanasynda 11 bala men úsh ata-ana dárigerlerdiń baqylaýynda qalyp, em qabyldap jatyr.