Aqmaral Álnazarova Másimovtiń rýy týraly aqparatqa qatysty pikir bildirdi

ASTANA. KAZINFORM – Densaýlyq saqtaý mınıstri Aqmaral Álnazarova Úkimet otyrysynan keıin ótken baspasóz máslıhatynda Ulttyq qaýipsizdik komıtetiniń burynǵy tóraǵasy Kárim Másimovtiń rýy týraly áleýmettik jelide taraǵan aqparat týraly pikir bildirdi.

«Araı Tólemisova deıtin medıtsına doktory YouTube arnalardyń birine bergen suhbatta medıtsınalyq qujattardan K. Másimovtiń rýy Naıman ekenin kórgenin aıtty. Medıtsınalyq qujattarda shynymen de adamnyń rýy týraly málimet jazyla ma? Adamnyń jeke derekterin kópshilikke jarııalaý qanshalyqty zańdy?» - dep surady jýrnalıst.

Mınıstr ol suhbatty kórmegendikten, máseleni zerttep baryp naqty málimet bere alatynyn aıtty.

«Men ol YouTube arnasyndaǵy suhbatty kórgen joqpyn. Qosymsha anyqtap aıtaıyq. Negizi rýdyń medıtsınalyq qujattarda jazylýyna baılanysty eshqandaı shart joq. Sondyqtan qosymsha aqparat kerek bolsa, taǵy zerttep aıtaıyq», - dedi Aqmaral Álnazarova.