Aqmaral Álnazarova MÁMS júıesiniń basty nátıjelerin atady

ASTANA. KAZINFORM — Bıyl elimizde ómir súrý uzaqtyǵy 75,8 jasqa jetkiziledi. Bul týraly búgin Úkimet otyrysynda Densaýlyq saqtaý mınıstri Aqmaral Álnazarova aıtty.

— Mindetti áleýmettik medıtsınalyq saqtandyrý engizilgen sátten bastap kútiletin ómir súrý uzaqtyǵy 75,4 jasqa jetti. Dúnıejúzilik banktiń derekterine sáıkes, osy kórsetkish boıynsha Qazaqstan Ortalyq Azııa elderi arasynda kósh bastap tur. Osy jyly bul kórsetkishtiń 75,8 jasqa jetkizý úshin jumys istep jatyrmyz. Ólim-jitim deńgeıin tómendetý — bizdiń basty mindetimiz. Bıyl birinshi jartyjyldyqta bul kórsetkish 3 paıyzdy qurady. Ana ólim-jitimi tiri týǵan 100 myń balaǵa shaqqanda 14,8-den 10,10-ǵa deıin aıtarlyqtaı tómendedi, náreste ólim-jitimi tiri týǵan 1 myń nárestege shaqqanda 7,93-ten 6,80-ge deıin qysqardy, — dedi mınıstr.

Aqmaral Álnazarovanyń aıtýynsha, bul densaýlyq saqtaý salasynyń oń dınamıkasyn rastaıdy jáne júrgizilgen júıeli reformalar men qarjylyq qamtamasyz etýdi kúsheıtýdiń, onyń ishinde mindetti áleýmettik medıtsınalyq saqtandyrýdy engizýdiń tikeleı nátıjesi sanalady. 

— Búgingi tańda MÁMS óziniń nátıjesin berýde dep oılaımyn. Atap aıtsaq, qarjylandyrý ósip keledi, medıtsınalyq kómekke qoljetimdilik keńeıýde, básekelestik kúsheıip, medıtsınalyq kórsetkishter jaqsaryp jatyr. Budan ári qabyldanǵan normalardy sapaly iske asyrý qajet, — dedi ol.

Buǵan deıin 2026 jyly MÁMS derekterin beretin memlekettik organdardyń tizimi jańartylatynyn jazǵan edik.

Sondaı-aq 2026 jyly dári-dármektiń qoljetimdiligin arttyratyn joba iske qosylatyny anyqtaldy.