Aqmaral Álnazarova MÁMS júıesinen tys qalǵan adamdarǵa qatysty pikir bildirdi
ASTANA. KAZINFORM — Densaýlyq saqtaý mınıstri Aqmaral Álnazarova MÁMS júıesinen tys qalǵan 3,3 mln adamnyń máselesine qatysty pikir bildirdi. Onyń arasynda 1 mln adam jergilikti atqarýshy organdar esebinen MÁMS-ke engizilmek.
Atap aıtqanda, búgin Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine mindetti áleýmettik medıtsınalyq saqtandyrý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.
Zań jobasynda jergilikti bıýdjet qarajaty esebinen jumyssyzdar men halyqtyń osal toby sanatyndaǵy adamdar úshin MÁMS jarnalaryn tóleý eskerilgen. Osy sharalardyń esebinen 2026 jyly MÁMS júıesimen qosymsha 1 mln-nan astam adam qamtylady.
Osy oraıda Májilistiń jalpy otyrysynan keıin tilshiler qalǵan 2 mln-nan astam MÁMS júıesimen qalaı qamtylatynyn surady.
— Bul adamdardy MÁMS-ke májbúrlep kirgizý júıesi qarastyrylmaǵan. Basqa memleketterde jeke adamdardyń medıtsınalyq saqtandyrý júıesine jarnanyń ýaqytyly tólenýin qarjy mınıstrlikteri qadaǵalaıdy. Qazaqstanda bul másele áli de zańnama aıasynda sheshimin tappady. Sondyqtan elimizdegi adamdar ony ózi sheshedi, ıaǵnı jarna tólese, tıisti kómekti alady. 20 mln adamnyń 12,1 mıllıonyna memleket tólep jatyr. Taǵy 1 mln adamdy jergilikti atqarýshy organdardyń esebinen MÁMS júıesine engizýdi usynyp otyrmyz. Jalpy, múgedektigi bar adamdardyń sanatyna jatpasa, kópbalaly ana nemese stýdent bolmasa, resmı túrde jumyssyz atanbasa, onda bul adamdar ózderiniń qarajaty esebinen MÁMS júıesine qosylýy kerek, — dedi A. Álnazarova Parlament Májilisinde tilshiler suraǵyna jaýap bere otyryp.
Eske salsaq, qazir shamamen 16,7 mln (82,3%) adam saqtandyrylǵan bolsa, onyń 12,1 mıllıony (72,5%) jeńildikti sanattarǵa jatady, 3,3 mln adam MÁMS júıesinen tys qalǵan.
Onyń ishinde 2,4 mln adamnyń ómir súrý deńgeıi qanaǵattanarlyq azamattar bolsa, al 1 mıllıony áleýmettik ál-aýqattyń daǵdarystyq jáne shuǵyl deńgeılerine jatatyn osal toptaǵy azamattar, ıaǵnı tabysy tómen ári otbasynyń bazalyq qajettilikterin áreń jabatyn adamdar.