Aqmaral Álnazarova balalar stomatologııasyndaǵy kezek máselesin sheshýdi talap etti
ASTANA. KAZINFORM - Densaýlyq saqtaý mınıstri Aqmaral Álnazarova óńirdiń basshylaryna balalarǵa stomatologııalyq kómektiń qoljetimdiligin qamtamasyz etý boıynsha jumysty kúsheıtýdi tapsyrdy, dep habarlaıdy mınıstrliktiń bapasóz qyzmeti.
Mektepke deıingi jastaǵy balalarǵa jáne em alýǵa talon alý kezinde kezekterdi joıýǵa erekshe nazar aýdaryldy.
-Biz úshin eń bastysy – eseptilik te, qaǵaz júzindegi kórsetkishter de emes. Ár kórsetkishtiń artynda naqty bala jáne naqty otbasy tur. Eger ata-ana balasyna stomatologııalyq kómek alý úshin tańǵy saǵat beske kelip, kezekte turýǵa májbúr bolsa, demek, júıe jetkilikti deńgeıde jumys istep turǵan joq. Biz muny túzetýimiz kerek, – dedi Aqmaral Álnazarova.
Mınıstr búginde elimizde balalarǵa stomatologııalyq kómek kórsetý úshin qajetti ınfraqurylym qalyptasqanyn atap ótti.
Memlekettik baǵdarlamalardyń sheńberinde balalarǵa kórsetiletin stomatologııalyq kómek memleket tarapynan qarjylandyrylady. Osyǵan baılanysty, mınıstrdiń aıtýynsha, negizgi nazar qolda bar resýrstardy tıimdi uıymdastyrý men úılestirýge aýdarylýy tıis.
-Búginde balalarǵa stomatologııalyq kómek memleket tarapynan qarjylandyrylady. Sondyqtan bul máseleni ata-analardyń moınyna júktemeýimiz jáne ár joly qosymsha bıýdjet qarajatyn izdemeýimiz kerek. Eń aldymen, qolda bar resýrstardyń jumysyn durys uıymdastyrý qajet, – dep atap ótti mınıstr.
-Bala ata-anasy talon ala almaǵany nemese birneshe saǵat kezekte turǵany úshin ǵana qajetti kómeksiz qalmaýy tıis. Bizdiń mindetimiz – qajetti kómektiń der kezinde jáne otbasynyń turǵylyqty jerine jaqyn jerde qoljetimdi bolýyn qamtamasyz etý, – dedi Aqmaral Álnazarova.
Mınıstr oblystar ákimderiniń orynbasarlary men beıindi basqarmalarǵa densaýlyq saqtaý, bilim berý basqarmalary, medıtsınalyq uıymdar jáne Áleýmettik medıtsınalyq saqtandyrý qory arasyndaǵy ózara is-qımyldy kúsheıtýdi tapsyrdy.
-Ata-analar áleýmettik jelilerge júginýge nemese shaǵym jazýǵa májbúr bolǵansha kútpeýimiz kerek. Jergilikti jerdegi basshylar mundaı máselelerdi azamat medıtsınalyq kómek alý kezinde kedergige tap bolǵanǵa deıin anyqtap, der kezinde sheshýi tıis, – dedi mınıstr.
Keńestiń qorytyndysy boıynsha óńirlerge balalarǵa stomatologııalyq kómektiń qoljetimdiligi máselesin erekshe baqylaýǵa alý tapsyryldy.
Densaýlyq saqtaý mınıstrligi jaǵdaıdy monıtorıngteýdi jáne elimizdiń barlyq óńirlerinde balalarǵa kórsetiletin medıtsınalyq qyzmetterdiń naqty qoljetimdiligin baǵalaýdy jalǵastyrady.
Osyǵan deıin Qazaqstanda 56 stomatologııalyq klınıkanyń lıtsenzııasyn erikti túrde qaıtarǵany týraly jazdyq.
