Ákim túrik aspazy Býrak Ózdemırge nege shapan japqanyn túsindirdi

Túrkistan oblysynyń ákimi Darhan Satybaldy Ortalyq kommýnıkatsııalar qyzmetinde ótken brıfıngide túrik aspazy Býrak Ózdemırge nege shapan japqanyn túsindirdi, dep habarlaıdy Kazinform.

«Túrkistanǵa kelgen belgili aspaz Býrak Ózdemırge shapan japqan edińiz. Ol Túrkistanda meıramhana ashatynyn aıtyp ketti. Sol usynys ne bolyp jatyr? Túrik kásipkerine kórsetkendeı qurmetti ózimizdiń kásipkerlerge kórsetip júrsiz be?», - dep surady jýrnalıst.

Oblys ákimi áıgili aspazdy Ózbekstanda júrgen jerinen aldyrǵanyn aıtty.

«Ony biz Tashkentte júrgennen keıin beri qaraı shaqyrdyq. Shaqyrǵannan keıin kelip, Túrkistandy kórip, ózi tańǵalyp ketip otyr. Onyń málimeti boıynsha Túrkistanǵa kelgennen keıin myńdaǵan adam jazypty. Oqyrmanynyń sany 70 mıllıondaı eken. «Osylardyń bári kórip otyr», - dep, meıramhana ashý týraly óz usynysyn berdi. Biraq ol ózi ashpaıdy. Franshızasyn beredi, sondaı ýáde berdi. Sol franshıza boıynsha meıramhana salatyn kásipkerler bolsa, qoldaýǵa daıynbyz. Al shapandy Túrkistanǵa kelgen soń japtyq», - dedi ol.

Ákimniń sózinshe, osy sapardan keıin Túrkııa jastarynyń nazary Túrkistanǵa aýǵan.

«Túrik memleketindegi jastar da ol arqyly Túrkistandy tanyp, ol arqyly keseneni, Kerýen saraıdy kórip jatyr. Túrki memleketteriniń rýhanı astanasy bar ekenin bilip jatyr. Osyndaı tanymal azamattardy biz árqashan shaqyramyz. Shapan jabýǵa daıynbyz. Eshqandaı problema joq. Qazaqstandyq kásipkerlerdi men shaqyrmaımyn. Olardyń aldyna men ózim baram. Ár aýdan biledi. Shaǵyn tseh ashsa da, ózim baryp tikeleı suhbattasamyn, qandaı kómek kerek ekenin suraımyn», - dedi Darhan Satybaldy.