Ákim Tarazı turǵan úıge eskertkish taqta ornatyldy
ASTANA. KAZINFORM — Búgin qazaqtyń kórnekti jazýshysy Ákim Tarazı turǵan úıge eskertkish taqta ornatyldy. Sonymen qatar, Kúlásh Baıseıitova atyndaǵy Qazaq ulttyq óner ýnıversıtetinde qalamger atyndaǵy májilis zaly ashylyp, dóńgelek ústel ótti.
Saltanatty sharaǵa dramatýrgtiń kózin kórgen izbasarlary men qos palata depýtattary, memlekettik uıymdardyń basshylary kelgen. Jınalǵan qaýym jazýshy jaıly estelikterimen bólisti.
— Jazýshy — shyǵarmasymen máńgi ómir súredi. Al osyndaı memorıaldyq taqta arqyly onyń shyǵarmashylyǵy men ómirbaıany urpaqtan-urpaqqa jete beredi. Ákim Tarazı aǵa qazirgi zaman týraly jazatyn. Ǵasyrǵa jýyq ómir súrip, artynda óshpeıtin mol mura qaldyra bilgen tulǵa. Menińshe, Ákim aǵa ólgen joq. Onyń máńgilik ómiri endi bastaldy, — deıdi jazýshynyń rýhanı inisi Tólen Ábdik.
Memorıaldyq eskertkish taqta Ahmet Baıtursynov kóshesiniń boıyndaǵy bıik úıdiń qabyrǵasyna qoıyldy. Taqtaısha ózi uzaq jyldar boıy eńbek etken Kúlásh Baıseıitova atyndaǵy Qazaq ulttyq óner ýnıversıtetine qarap tur. Ahmet Baıtursynov kóshesindegi myna úıde jazýshy 20 jyl turǵan.
— Ákim Tarazı úlken mektep kórgen jazýshy. Keshegi dúnıeden ótken uly klassık Muhtar Áýezovtiń kózin kórgen. Ǵabıt Músirepovtiń shákirti bolǵan. Osylaı eske alyp, taqtanyń qoıylýyna bas qosyp, esterine alyp jatyr. Men jınalǵan kópshilikke, aıaýly baýyrlarǵa, qalamdas inilerine, qaryndastaryna alǵys aıtqym keledi, — deıdi jazýshynyń jary Roza Muqanova.
Aıta keteıik, Ákim Tarazı «Tulpardyń izi», «Qarash-Qarash oqıǵasy», «Mustafa Shoqaı», «Arman — ataman», «Qyz jylaǵan» syndy fılmderdiń stsenarııin jazǵan.
Budan buryn Prezıdent jazýshy Ákim Tarazıdiń dúnıeden ótýine baılanysty kóńil aıtqanyn jazǵan edik.
Sondaı-aq, 24 sáýirde Astana ortalyq meshitinde qazaqtyń kórnekti qaıratkeri, jazýshy Ákim Tarazımen qoshtasý rásimi ótti.