Ákim saılaýy: BQO-da jaýapty komıssııa qandaı jumys atqardy
Memleket basshysy Qasym-Jomart Toqaev Qazaqstan halqyna Joldaýynda bıyl pılottyq túrde respýblıkalyq mańyzy bar qala jáne aýdan ákimderiniń saılaýy ótetinin málimdegen bolatyn. Osyǵan oraı BQO oblystyq máslıhatynyń 2023 jyldyń 12 qyrkúıeginde ótken kezekten tys 6 sessııasynda qabyldaǵan sheshimimen óńirdegi ákim saılaýy ótetin úsh aýdan anyqtaldy, dep habarlaıdy Kazinform.
15 qazandaǵy málimetke sáıkes Bókeı Ordasy, Qaratóbe jáne Tasqala aýdandarynda 28 884 saılaýshy bar. Saıası naýqanǵa quramynda 378 múshesi bar 1 oblystyq aýmaqtyq, 3 aýdandyq aýmaqtyq, 63 ýchaskelik saılaý komıssııalary jumyldyryldy. QR Ortalyq saılaý komıssııasy bekitken kúntizbelik josparǵa sáıkes, saılaý ýchaskesi shekaralaryn qalyptastyrý jumystary júrgizilip, aýmaqtyq jáne ýchaskelik saılaý komıssııalarynyń quramdary BAQ betterinde jáne resmı ınternet resýrstarda jarııalandy. Jergilikti atqarýshy organdarmen birlesip saılaý ýchaskeleri ornalasqan jerlerge tııanaqty taldaý jasaldy, qosymsha jabdyqtaý jumystary ýaqytynda júrgizildi. Aýdan ákimderiniń saılaýyn aqparattyq qamtamasyz etýdiń oblystyq medıa-jospary jasaqtalyp bekitildi.
Ýchaskelik komıssııalar 5 qazannan jumysyna kiristi jáne QR Ortalyq saılaý komıssııasy bekitken kúntizbelik josparǵa sáıkes, aýdan ákimderin saılaýshylardyń tizimin jergilikti atqarýshy organdardan alyp, tizimdi saılaýshylarǵa usyndy. Sondaı-aq ýchaskelik komıssııa músheleri saılaýshylarǵa shaqyrý bıletin berip, olarǵa saılaý ótetin oryn men ýaqytyn habardar etti. Komıssııa músheleri aýdandardaǵy múmkindigi shekteýli 211 adamnyń konstıtýtsııalyq quqyǵyn júzege asyrýyna barlyq jaǵdaı jasaýdy qolǵa aldy. Múgedektigi bar adamdar úshin saılaý ýchaskeleriniń qoljetimdiligine taldaý júrgizilip, olarmen tyǵyz baılanys ornatyldy. Daýys beretin kúni ınvataksı qyzmetin uıymdastyrý josparlandy.
Saılaý komıssııa músheleriniń biliktiligin shyńdaý da ózekti másele. BQO aýmaqtyq saılaý komıssııasy bul iske udaıy jáne úzdiksiz nazar aýdaryp keledi. Oblysta komıssııalarǵa praktıkalyq jáne ádistemelik kómek kórsetilip otyr. 371 aýdandyq aýmaqtyq jáne ýchaskelik komıssııa músheleri 100 paıyz QR Ortalyq Saılaý komıssııasynyń qashyqtan oqytý men testileýden ótkizildi. Buǵan qosymsha aýdandarda saılaý zańnamasy máseleleri boıynsha ASK, ýchaskelik saılaý komıssııasy múshelerin qosymsha testileý qolǵa alyndy. Barlyq deńgeıdegi saılaý komıssııasynyń múshelerin kezeń-kezeńmen (kaskadty) oqytý kestege sáıkes júrgizilip jatyr.
Zamanaýı tsıfrlyq múmkindikter bul mańyzdy saıası naýqanda tolyq paıdalanylyp jatyr. Óz kezeginde aýdan turǵyndaryna saılaý ýchaskelerinde tizimde bar-joǵyn, daýys berý ýchaskesin anyqtaıtyn sall-ortalyqtar quryldy. Resmı veb servıs, t.me/sailau2023bot telegram chat bot arqyly kez kelgen saılaýshy JSN arqyly daýys beretin saılaý ýchaskesiniń mekenjaıy, baılanys nómiri jaıly jan-jaqty aqparat ala alady.
Sonymen qatar osy servısterdiń kómegine júgingen aýdan turǵyndary ákim laýazymyna úmitkerler, olardyń saılaýaldy baǵdarlamalary týraly málimettermen tanysa alady. Al kandıdattardyń sany 9 adam, ár aýdan boıynsha 3 úmitkerden tirkeldi. Qazir kandıdattardyń saılaý aldyndaǵy úgit-nasıhat jumystarynyń qyzǵan shaǵy. Kandıdattardyń úgit materıaldaryn memleket esebinen jarııalaýǵa óz sharttary, tártibin jáne tólem mólsherin 2 telearna, 2 radıoarna, 9 merzimdi basylym, 7 aqparat agenttigi usyndy. Kandıdattardyń saılaýshylarmen kezdesýi úshin úsh aýdanda 50 oryn, al úgit materıaldaryn ornalastyrýǵa 62 oryn berildi. Úgit-nasıhat jumystaryn júrgizý úshin ár kandıdatqa jergilikti bıýdjetten 400 myń teńge qarajat bólingen. QR Ortalyq Saılaý komıssııasy tarapynan túsken beıneaýdıo rolıkter «AQJAIYQ» jáne TDK-42 telearnalarynda, oblystyq radıo men «RadıoOK» radıo arnalarynda rotatsııa tásilimen efırge shyǵyp keledi. Saılaý kezeńiniń úsh «tolqynyn» qamtıtyn rolıkter HQKO, «Qazposhta», mádenıet úıleri men klýbtardaǵy ekran men dybys kúsheıtkish qurylǵylardyń kómegimen taralyp jatyr.
Esterińizge salsaq, saılanatyn ákimniń ókilettik merzimi – 4 jyl.
