Ákim Olımpıada júldegeri Nurbek Oralbaıǵa kólik mingizip, jattyqtyrýshysyna qarjylaı syı jasady
ASTANA. KAZINFORM – Astana qalasynyń ákimi Jeńis Qasymbek Instagram paraqshasynda Parıj Olımpıadasynyń kúmis júldegeri Nurbek Oralbaı men onyń jattyqtyrýshysyna arnaıy syılyq berilgeni týraly jazdy, dep habarlaıdy elorda ákimdiginiń resmı saıty.
«Parıjde ótken Olımpıada oıyndarynyń kúmis júldegeri Nurbek Oralbaımen jáne onyń jattyqtyrýshysy Asqar Erkebaevpen kezdestim. Nurbek Oralbaı elimizdiń ári qalamyzdyń atynan synǵa tústi. Onyń bul jetistiginiń artynda myńdaǵan saǵattyq jattyǵýlar, sol sııaqty otbasynyń, jattyqtyrýshysynyń jáne týystarynyń qoldaýy men ózine degen senimi jatyr. Demeýshiler esebinen Nurbek Oralbaıǵa Land Rover Defender avtokóliginiń kilti, al jattyqtyrýshysyna 10 mln teńgeniń sertıfıkaty tabys etildi. Sportshylarymyzǵa bıik-bıik shyńdardy baǵyndyrýyn tileımin!» – dep jazdy Jeńis Qasymbek.
Eske sala keteıik, bokstan erler arasynda 80 keli salmaqta Nurbek Oralbaı Parıj Olımpıadasynyń kúmis júldegeri atandy.
