Ákim oqýshyny jezókshelikke májbúrleý isi týraly pikir bildirdi
QYZYLORDA. KAZINFORM — Qyzylorda oblysynyń ákimi Nurlybek Nálibaev óńirdegi mektep oqýshysyn jezókshelikke májbúrleý oqıǵasy týraly tilshiler suraǵyna jaýap berdi.
Tamyz aıynda Qyzylorda qalasynda mektep oqýshylary «synyptasyn seks-quldyqta ustaǵan» dep kúdikke ilindi. Bul týraly qoǵamdyq qorǵa jábirlenýshiniń ata-anasy málim etken.
«Qyzylorda oblysynyń bilim salasynda zorlyq-zombylyq, adam óltirý, sýıtsıd jaıttary jıi oryn bolady. Oblystyq bilim basqarmasynyń basshysy Asqarbek Esjanov eki ret sógis alsa da, nege qyzmetinen bosatylmady?» - dep suraq qoıdy tilshiler Ortalyq kommýnıkatsııalar qyzmetinde.
Óz jaýabynda N. Nálibaev shynynda da, óńirde osyndaı jaǵdaılar jıilegenin, tárıbe men bilim salasyna qatysty jıyndar men reıdter kóptep ótkizilip jatqanyn aıtty.
«Bilim basqarmasyna birjaqty qaraýǵa bolmaıdy dep esepteımin. Ol azamat buǵan deıin bilim salasynda jumys istep kelgen. Qalada bilim bólimin basqarǵan, mektep dırektory, aýdan ákimi, qala ákiminiń orynbasary sekildi kóp laýazymdy atqarǵan tájirıbeli áriptesterimizdiń biri. Bir-eki kemshilik úshin ár basqarma basshysyn bosata bersek, bul jaqta adam qalmaıdy. Biz oǵan qatań sógis berdik, aldaǵy ýaqytta nátıje bolsa áriptesimizben birge jumys isteımiz, taǵy da qaıtalansa – tıisti sheshim qabyldanady. Aldaǵy ýaqytta mundaı jaǵdaılardy boldyrmaý úshin jumys isteımiz», - dedi oblys basshysy.
Sondaı-aq, oblys basshysy jábir kórgen oqýshynyń otbasyna qoldaý men kómekti jalǵastyrýǵa daıyn ekenin jetkizdi.
«Oqýshynyń anasy Almaty qalasynda jumys istep júrgen. Qyzylordaǵa kelgen soń sóılestik, túsindirý jumystaryn júrgizdik, ol kisiniń usynymdaryn tyńdadyq. Osy oqıǵadan keıin qaýipsizdik maqsatynda olardy basqa úıge kóshirý týraly usynys jasadyq. Alaıda, bas tartty. Biz ári qaraı da qoldaý kórsetýge daıynbyz», - dedi ol.
Óńir ákimi qazir tergeý amaldary júrip jatqanyn, sodan keıin tolyq jaýap bolatynyna ýáde berdi.
«Qazir tergeý amaldary aıaqtalmaı, sot sheshimi shyqpaı, bireńe aıtýǵa erterek. Bári aıaqtalǵan soń, mindetti túrde keń kólemde jaýap beremiz. Osy salaǵa jaýapty orynbasarym, bilim basqarmasy, quqyq qorǵaý organdarynyń basshylary osy oqıǵa jóninde brıfıng ótkizedi», - dedi N. Nálibaev.
Eske sala keteıik, atyshýly oqıǵa boıynsha keleńsizdikke jol bergender qyzmetinen ketti.
Keıin QR ІІM jábirlenýshi turatyn aýmaqty táýlik boıy kúzetti.
Ǵanı Beısembaev oqýshyny jezókshelikke májbúrleý oqıǵasyna qatysty pikir bildirdi.
Tergeý júrip jatqanda Qyzylordada oqýshyny jezókshelikke májbúrlegen 8 kúdikti qamaldy.
Keıinirek oqýshyny jezókshelikke májbúrleýge qatysty 13 adam anyqtaldy.
Al 11 qarasha kúni oqýshyny jezókshelikke májbúrlegen bir aıyptalýshyǵa úkim shyqty.
