Ákim: Astanany jylytý maýsymyna daıyndaý jumystary kestege saı júrip jatyr
ASTANA. KAZINFORM — Astana qalasynyń ákimi Jeńis Qasymbek Instagram paraqshasynda tirshilikti qamtamasyz etý nysandarynyń jumysy jaıly jazdy.
Shahar basshysy atap ótkendeı, jylý berý maýsymy aıaqtalysymen-aq, jylýmen qamtamasyz etý nysandaryn aldaǵy maýsymǵa daıyndaý jumystary bastalyp ketken.
— Qalada ómir súrý sapasy kóptegen faktorǵa baılanysty. Al onyń ishinde tirshilikti qamtamasyz etý nysandardyń jumysy mańyzdy ról atqarady. Jylý berý maýsymy aıaqtalysymen-aq, jylýmen qamtamasyz etý nysandaryn aldaǵy maýsymǵa daıyndaý jumysyna birden kiristik. Premer-mınıstrdiń birinshi orynbasary Roman Sklıarmen, energetıka mınıstri Erlan Aqkenjenovpen jáne premer-mınıstrdiń keńesshisi Ermek Marjyqpaevpen birge tirshilikti qamtamasyz etý nysandarynyń jumysyn tekserdik. Osylaısha, energııa kózderine qatysty 2 qazandyq pen 2 týrbınaǵa kúrdeli jóndeý, al 18 qazandyqqa aǵymdaǵy jóndeý júrgizý josparlanǵan. Jóndeý jumysy qatań túrde kestege saı júrip jatyr, — dedi qala ákimi.
Jeńis Qasymbektiń sózinshe, sol sııaqty qazir «Astana-Teplotranzıt» AQ aıasynda qalanyń jylý jelisiniń 1,5 km-nyń 1,2 shaqyrymy jóndeldi, al 4,1 km jeli rekonstrýktsııadan ótti.
— «QazaqGazAimaq» AQ-nyń ınvestıtsııalyq baǵdarlamasy aıasynda gaz taratý jelisiniń 5 ýchaskesindegi sheńberlik qosylym qurylysyna arnalǵan qurylys-montaj jumysy, sondaı-aq Telman turǵyn alaby jáne basqa da aýmaqtarda uzyndyǵy 16,3 shaqyrymdy quraıtyn tómen qysymdy gaz taratý jelisiniń qurylysy júrgiziledi. Osyǵan deıin JEO-3-tiń birinshi kezeńi, sondaı-aq «Turan» jáne «Ońtústik-Shyǵys» gaz jylý stantsııalarynyń iske qosylýynyń arqasynda qalanyń jylý qýaty 30 paıyzǵa artty. Atalǵan nysandar qalaǵa qosymsha saǵatyna 1100 Gkal jylý qýatyn berip otyr. Bıyl «Turan» stantsııasynyń ekinshi kezeńin aıaqtaý josparlanyp otyr. Sondaı-aq «Telman» stantsııasynyń qurylysy jalǵasyp, JEO-2 nysanyn keńeıtý jumysy bastalady, sol sııaqty «Ońtústik-Batys» gaz jylý stantsııasynyń jobalaý kezeńi qolǵa alynady. Osy jobalardyń bárin iske asyrý 2035 jylǵa deıin josparlanǵan jylý energııasy qoryn qamtamasyz etýge múmkindik beredi, — dedi Qasymbek.
Budan bólek, JEO-3 nysanynyń birinshi kezeńin rezervtik otyn kózderimen qamtamasyz etý jumysy júrip jatyr. JEO-3 tabıǵı gazben jumys isteıdi jáne saǵatyna 440 Gkal kóleminde eń joǵary qýat óndiredi. Beriletin jylý energııasy elordanyń ońtústik-batys bóliginiń qajetin óteýge múmkindik beredi.
Sondaı-aq, «Araı» qosalqy stantsııasynyń qurylysy júrip jatyr. Onyń iske qosylýy bıylǵa josparlanǵan. Bul qosalqy stantsııa Uly dala dańǵyly men Aıtmatov kóshesiniń boıyndaǵy qalanyń ońtústik-batys bóligin elektrmen jabdyqtaıdy.
Sonymen qatar, «Astana-REK» AQ ınvestıtsııalyq baǵdarlamasyna 54,6 km áýe jáne kabel jelilerine, 73 transformatorlyq qosalqy stantsııa men taratý pýnkterine kúrdeli jáne aǵymdaǵy jóndeý jumysy kiredi.
Osyǵan deıin elorda ákimdigi Taldykól mańyndaǵy beton zaýyty týraly aqparatty teriske shyǵardy.