Aqqýly aýdanynda muz astynan balyq aýlaýdan 70-ke jýyq balyqshy synǵa tústi
PAVLODAR. QazAqparat - Pavlodar oblysyndaǵy Aqqýly aýdany Jambyl aýyldyq aımaǵynda Ertis ózeniniń jaǵasynda muz astynan balyq aýlaýdan jarys ótkizildi, dep habarlaıdy pavlodarnews.kz.
Bul týraly ishki saıasat bóliminiń mamany Amanjol Eren málim etti.
«Jyl saıyn ótetin dástúrli balyq aýlaýdan saıysqa bıyl Aqsý, Pavlodar, kórshiles jatqan Shyǵys Qazaqstan oblysynyń Besqaraǵaı aýylynan kelgen azamattar qatysty. Jalpy on úsh komandanyń quramynda úsh adamnan jáne jekeleı 20 adam balyq aýlaýdan synǵa tústi»,- deıdi Amanjol Eren.
Jarystyń ótýine muryndyq bolǵan jergilikti ákimdik pen ardagerler qoǵamy balyqshylarǵa tegin ystyq tamaq pen shaı daıyndady.
Eń alǵashqy balyq aýdandyq aýrýhananyń tis dárigeri Darhan Qalıevtyń qarmaǵyna túsken. Qyzylásker aýyldyq aımaǵy Chernoe aýylynyń turǵyny bes jasar Ásııa Turǵynbaı - «Eń kishkentaı balyqshy», 78 jastaǵy Ázken Dúısenuly - «Eń úlken balyqshy» jáne Jańatań aýylynyń qurama komandasy «Eń iri balyq» atalymyna laıyq dep tanyldy. 
Sondaı-aq, múmkindigi shekteýli jandardyń arasynda Chernoe aýylynan Seısenbaı Amanjolov jeńimpaz atandy. Jalpy komandalyq esepte 1 oryndy jeńip alǵan ShQO komandasy bir keli 600 gramm alabuǵa alyp ketken. Nátıjesinde Jańatań aýylynyń quramasy 2 oryndy, «Dostar» quramasy 3 oryndy ıelendi.
Birinshi orynǵa aqshalaı syılyq retinde 15 bes myń, ekinshi orynǵa 10 myń jáne úshinshi orynǵa bes myń teńge tabys etildi jáne «Master-fish» dúkeninen sertıfıkattar men kýbok usynyldy.
