Aqqýly aýdanynda Abaı Qunanbaıulynyń týǵan kúnine oraı alaman aıtys ótti
ASTANA. QazAqparat - Aqqýly aýdanynyń ortalyǵy Aqqý aýylynda Uly aqyn, aǵartýshy, qazaqtyń jazba ádebıetiniń jáne ádebı tiliniń negizin salýshy Abaı Qunanbaıulynyń týǵan kúnine arnalǵan «Abaı murasy - halyq qazynasy» atty oblystyq jas aqyndar aıtysy ótti, dep habarlaıdy pavlodarnews.kz.
Alamanǵa oblystyń ár óńirinen 8 jas aqyn qatysty. Olar 4 jup bolyp ózara óleńnen órnek salyp, baq synasty. Jyr tókpelep, aıtystaǵy dástúr boıynsha barlyǵy da qarsylasyn qapy qaldyryp, oza shabýǵa tyrysty. Jyr saıysyna «Alash» syılyǵynyń ıegeri, aqyn Arman Qanı bastaǵan oblystyq, respýblıkalyq aqyndar aıtysynyń júldegerleri qazylyq etti.
«Búgin ózgeshe aıtys boldy. Aqyndar Abaıdy, onyń ákesi Qunanbaıdy, sonymen qatar, jaqynda ǵana tarıhı ataýyn qaıtarǵan Aqqýly mekenin taqyrypqa arqaý etti. Búgingi aıtysqa jalpy 8 aqyn qatysyp otyr. Bul aıtys jas aqyndarymzdyń talantyn, darynyn kórsetýde. Jas aqyndarymyz shyńdalyp keledi. Olar oblysymyzdyń namysyn qorǵap, aıtys óneriniń jalaýyn jelbiretip, týyn jyqpaı kele jatyr. Alla qalasa, bul aıtys respýblıkalyq deńgeıge kóterilip, asqaqtaıdy degen úmittemiz», - dedi Arman Qanı.
Aqyndaryn alaqanda aıalap, úkilep júrip báıgege qosatyn qaımana eldiń qashanda asyǵa kútetini - otty jyr. Osy oraıda jınalǵandar jas aqyndardyń sheberligi men sheshendigine erekshe yqylas tanytyp, shabyt berip otyrsa, aqyndar jyrǵa shóldegen eldi sóz qudiretimen sýsyndata aldy.
Qazylar alqasynyń sheshimimen bas júldeni baıanaýyldyq Altaı Qadyrbek ıelenip, júldeli 1 oryn Nurbek Bákirge buıyrdy. Al, 2 orynǵa pavlodarlyq Aıbek Oralhan laıyq dep tanylsa, 3 oryndy aqqýlyq aqyn Marǵulan Janbaý jeńip aldy. Sonymen qatar, alamanda sóz sheberligin tanyta bilgen jas aqyndarǵa arnaıy nomınatsııalar berildi. Aqqýly aýdany ákiminiń arnaıy júldesimen Mızan Jumáli marapattalsa, «Jaýhar aqyn» nomınatsııasy Azamat Bazarbaıǵa, «Óleń sóziń patshasy» - Máres Baıronǵa, «Arqaly aqyn» - Qýandyq Bashoıǵa tabystaldy.
