Aqqýly aýdanynan 400-ge jýyq adam kóship ketken - Pavlodar oblysy
PAVLODAR. QazAqparat - Búgingi tańda Aqqýly aýdany halqynyń sany 12500 adamdy quraıdy. Bul týraly óńirlik kommýnıkatsııalar qyzmetinde «Aqqýly aýdanynyń áleýmettik-ekonomıkalyq damýy» taqyrybynda ótken baspasóz máslıhatynda aýdan ákimi Ernur Áıtkenov málim etti, dep habarlaıdy pavlodarnews.kz.
«Demografııalyq jaǵdaıǵa kelsek, bizde 423 adam kórsetkishimen teris saldo kórinis tabýda. Aýdanda týǵan adamdar men aýdan aýmaǵynan shyqqandardy eseptegende jaǵdaı osyndaı bolyp tur. Jalpy aýdan halqynyń sany 12500 adam»,- deıdi Ernur Áıtkenov.
Resmı statıstıkaǵa súıensek, bıylǵy jyldyń qańtar-qyrkúıek aılarynda aýdan aýmaǵynan 703 adam ketip, 403 adam kelgen. Osy aralyq ishinde aýdanda 156 sábı dúnıege kelgen. Byltyr bul kórsetkish 173 adamdy quraǵan. «Nátıjeli jumyspen qamtýdy jáne jappaı kásipkerlikti damytý» baǵdarlamasy boıynsha Aqqýly aýdanyna ońtústik óńirlerden 35 otbasy jáne oralmandardyń eki otbasy, jalpy 157 adam kóship kelgen. Olardyń arasynda dáriger, muǵalim, mehanızator, júrgizýshi sekildi mamandyq ıeleri bar.
«Qonys aýdarýshylardyń 49-y jumyspen qamtylyp, 20 adam kásipkerliktiń negizderi boıynsha bilim aldy, úsh adamǵa shaǵyn nesıe berildi. Kóship kelgen otbasylardyń arqasynda aýdannyń bilim berý mekemeleri 80 balamen tolyqty», - dedi Ernur Áıtkenov.
Qonys aýdarýshylarǵa memleketten bólinetin sýbsıdııalarmen birge, oblys basshylyǵynyń tapsyrmasymen ońtústikten kóship kelgender men oralmandardy qysqy ýaqytta kómirmen qamtamasyz etý jumystary qolǵa alyndy. Búginde 13 otbasy qatty otynmen qamtyldy jáne bul baǵytta jumys jalǵasýda. Sonymen birge, 2018 jyly «Dıplommen - aýylǵa!» baǵdarlamasy boıynsha aýdanǵa 30 jas maman kelip, 27-sine 70 AEK kóleminde kótermeaqy tólenip, 20 mamannyń baspana satyp alýyna 51,6 mıllıon teńgelik bıýdjettik nesıe berildi.
