Akkredıtatsııalaý erejesinde jýrnalıster pikirin barynsha eskerý kerek - mınıstr Abaev

ASTANA. QazAqparat - QR Aqparat jáne kommýnıkatsııalar mınıstri Dáýren Abaev jýrnalısterdi akkredıtatsııalaý erejelerin keńinen talqylaýdy tapsyrdy, dep xabarlaıdy QazAqparat tilshisi.

«Buqaralyq aqparat quraldaryn akkredıtatsııalaý erejeleriniń jobasyn erekshe atap ótkim kelip otyr. Vıtse-mınıstr Nurgúl Óserbaıqyzy Maýberlınovaǵa atalǵan jobany keńinen talqylaýdy tapsyramyn. Jýrnalısterdiń barlyq usynystary men eskertýlerin qamtý qajet. Akkredıtatsııalaý erejeleri tek konsensýs negizinde ǵana qabyldanýy shart. Buqaralyq aqparat quraldarynyń pikirlerin barynsha eskerý kerek», - dedi D.Abaev mınıstrliktiń alqa májilisinde.

Aıta keteıik, keshe Úkimet otyrysynan keıin mınıstr jýrnalısterdi akkredıtatsııadan ótkizý jáne taqyryp boıynsha suraq qoıý máselesine qatysty pikir bildirgen bolatyn. Mınıstrdiń aıtýynsha, jýrnalıst naqty bir mamannyń quziretine jatatyn kez kelgen suraqty qoıýǵa quqyly. Biraq is-shara basqa taqyryp boıynsha ótýi múmkin. Al moderator sol taqyryp boıynsha suraq qoıýǵa talap etedi.

«Endi moderator aldyn ala taqyrypty jarııalap, tek soǵan qatysty suraq qoıýǵa ótinish jasaı alady. Onda turǵan eshteńe joq dep oılaımyn. Biraq is-sharadan keıin maman, ıa bolmasa, sheneýnik óz quziretine jatatyn kez kelgen suraqqa jaýyp berýge mindetti. Ol úshin jýrnalıstiń akkredıtatsııasyn eshkim alyp qoımaıdy. Akkredıtatsııa týraly erejelerde yńǵaısyz suraqtarǵa qatysty eshteńe jazylmaǵan», - dedi D.Abaev jýrnalısterge bergen suxbatynda.

Onyń sózine qaraǵanda, erejede yńǵaısyz suraqtarǵa qatysty eshteńe jazylmasa da, moderatordyń tártibi saqtalmaǵan jaǵdaıda jýrnalıstti akkredıtatsııadan aıyrý máselesi bar.

«Biz ony alyp tastaıtyn shyǵarmyz. Sosyn akkredıtatsııadan ótken jýrnalıstrdiń sanyna qatysty bir másele bar. Biz barlyq redaktsııalardy qamtýǵa tyrysamyz. Biraq keı basylymdar 5-7 jýrnalısti akkredıtatsııaǵa jiberedi. Sodan oryn jetpeı jatady. Ol jaǵyn da qarastyramyz. Akkredıtatsııa úshin jýrnalıstiń kelisimshartyn kórsetý mindetin de alyp tastaımyz», - dep atap kórsetti D.Abaev.

Osy oraıda mınıstr jýrnalısterdi jazbasha usynys berýge úndedi. Atalǵan taqyrypty keńinen talqylaý úshin arnaıy jınalys ta ótkizýge kelisti.