Akkredıtatsııadan ótpegen jekemenshik emhanalar memlekettik tapsyrysty ala almaıdy - QR Densaýlyq saqtaý mınıstrligi
ASTANA. 6 qyrkúıek. QazAqparat - Kelesi aptadan bastap biz ambýlatorlyq-emhanalyq uıymdardy akkredıtatsııadan ótkizýdi bastaımyz. Bul týraly búgingi baspasóz máslıhatynda QR Densaýlyq saqtaý mınıstrligi Farmatsevtıkalyq jáne medıtsınalyq baqylaý komıtetiniń tóraıymy Laýra Ahmetnııazova málim etti.
Onyń habarlaýynsha, Qazaqstandaǵy medıtsınalyq uıymdardy akkredıtatsııalaý standarttary 2009 jyly qabyldanǵan bolatyn. Bıyl aqpan aıynda onyń barlyǵy halyqaralyq sharttarǵa saı jańartyldy. Sondyqtan ambýlatorlyq-emhanalyq uıymdar taǵy bir márte akkredıtatsııadan ótýi tıis. «Bizdiń boljamymyz boıynsha kelesi jylda halyqqa ambýlatorlyq-emhanalyq kómek kórsetýge memleket tarapynan qyrýar qarjy bólinedi. Jekemenshik mekemeler osy memlekettik tapsyrysty alýǵa múddeli ekendigi belgili. Sondyqtan biz olardy akkredıtatsııadan ótýge shaqyramyz. Sonyń arqasynda ǵana olar memlekettik tapsyrysty ala alady. Akkredıtatsııa tegin júrgiziledi», - dep atap kórsetti L.Ahmetnııazova. Aıta keteıik, búginde 464 mekeme memlekettik tapsyrys aıasynda tegin ambýlatorlyq-emhanalyq qyzmetti kórsetedi. Olardyń 67-si - jekemenshik uıymdar. «Qazir 16 jekemenshik mekeme akkredıtatsııadan ótýge ótinish bildirdi», - deıdi QR Densaýlyq saqtaý mınıstrligi Farmatsevtıkalyq jáne medıtsınalyq baqylaý komıtetiniń tóraıymy Laýra Ahmetnııazova.
