Aqkólden Nur-Sultanǵa joldyń ashylýyn kútken 150 kólik kele jatyr
NUR-SULTAN. QazAqparat – Aqkólden Nur-Sultanǵa osy ýaqytqa deıin joldyń ashylýyn kútken 150 kólik kele jatyr, dep habarlaıdy QazAqparat tilshisi QR ІІM baspasóz qyzmetine silteme jasap.
«Bul kólikterde aqtútek borannyń saldarynan joldyń ashylýyn kútip qalǵan júrgizýshiler men jolaýshylar kele jatyr. Kólikter tobyna jol boıyndaǵy eldimekenderden taǵy 20 kólik qosyldy. Birneshe bólikke bólingen ár tizbekte 30-35 kólikten qozǵalýda. Kólik tizbegimen birge qar tazalaýshy tehnıka, polıtsııa qyzmetkerleri men qutqarýshylar birge keledi», - dep habarlaıdy ІІM baspasóz qyzmetinen.
Kólik tizbeginiń quramynda kóbinese jeńil avtokólikter, jolaýshylar avtobýsy (onyń ishinde shetel azamattary da bar) bar. Sondaı-aq, júk kólikteriniń birazy Aqkólde qaldy. Qozǵalys qaýpi eskerilip, olar da tek qutqarýshy qurylymdardyń septesýimen jolǵa shyǵa alady.
