Aqkóldegi keıbir turǵyn úıler nege jylý júıesimen qamtylmaǵan
Aqkól qalasynda áleýmettik nysandarǵa jylý berý maýsymy 2018 jyldyń 25 qyrkúıeginde bastalyp, 35 bilim nysany, 28 densaýlyq saqtaý nysany jáne 28 áleýmettik nysanǵa tolyq 100 paıyz jylý berildi.
Qazannyń 1-nen bastap, 60 turǵyn úıdegi 1416 páter jylýmen qamtamasyz etildi.
Aqkól aýdandyq ákimdiginiń málimetinshe, qalada ortalyqtandyrylǵan jylý júıesine qosylý josparly túrde júzege asyrylýda.
Máselen, 2011 jyly jylý qazandyǵy salynsa, 2012 jyly Shyǵys shaǵynaýdanyndaǵy jylý júıeleri qalpyna keltirildi. Jylý qazandyǵy arqyly Nurmaǵambetov, Imanov, Býlavskıı jáne Abylaıhan kósheleriniń boıyndaǵy kóppáterli 16 turǵyn úı jylytyla bastady.
«Qazirgi kezde, kóppáterli 17 turǵyn úı jylý júıesine qosyldy. 2013 jyly turǵyn úı baǵdarlamasy boıynsha salynǵan Imanov kóshesiniń boıyndaǵy 4 qabatty №9 turǵyn úı qosyldy. Al, Nurmaǵambetov kóshesiniń boıyndaǵy 9 jáne 13 kóshesiniń boıyndaǵy turǵyn úılerge keletin bolsa, bul nysandar 1994 jyldan bastap, pesh jáne elektrjylytqyshty paıdalanyp keledi. Ókinishke qaraı, Shyǵys shaǵynaýdanyndaǵy ózge turǵyn úılerdi ortalyqtandyrylǵan jylý júıesine qosýǵa jylý qazandyǵynyń qýaty múmkindik bermeıdi. Buǵan qosymsha qarajat qarastyrylmaǵan» dep túsindirdi vedomstvodan.
Aqkól aýdany ákiminiń orynbasary Vladımır Elıseevtiń málimetinshe, qaladaǵy barlyq kópqabatty turǵyn úıdi ortalyqtandyrylǵan jylý júıesine qosý úshin «Aqkól qalasynyń Shyǵys shaǵynaýdanyndaǵy jylý júıesi men qazandyqtardy qalpyna keltirý» jobasy ázirlenip, memlekettik saraptamaǵa jiberildi. Jobanyń quny - shamamen 1 mıllıard teńge.
«Bul joba tek respýblıkalyq jáne oblystyq bıýdjetten qarjy bólingen kezde ǵana júzege asyrylýy múmkin. 2017 jyldyń 12 sáýirinde aýdan ákimdigi tarapynan QR Ulttyq ekonomıka mınıstrligine atalmysh jobany «2020 jylǵa deıin óńirlerdi damytý» baǵdarlamasyna engizý boıynsha jáne 2019 jyly respýblıkalyq bıýdjetten qarjy bólý týraly bıýdjettik ótinish joldandy», - dep tolyqtyrdy vedomstvodan.
