Aqkólde vagon aýdarylǵan jerdi TJD qyzmetkerleri tazartýda
AQKÓL. QazAqparat - Aqmola oblysynyń Aqkól stansasynda vagondar temirjoldan shyǵyp, aýdarylyp qalǵan jerde Tótenshe jaǵdaılar qyzmetkerleri jumys isteýde, dep habarlaıdy QazAqparat oblystyq TJD-ǵa silteme jasap.
Aqmola oblysy TJD málimetinshe, 5 mamyr kúni saǵat 01.55-te Aqkól qalasynyń aýmaǵyndaǵy 7-inshi temirjol jolynda №3495 júk poıyzy qalaǵa kire beriste dızeldi otyn jáne bıtýmdy 8 vagon (tsısterna) relsten shyǵyp ketken.
«Olardyń ishinde 5 vagon aýdarylyp qaldy (3 vagon joldyń oń jaǵyna, 2 vagon sol jaǵyna qulaǵan). Vagondardyń aýdarylýy saldarynan bir bútin tsısterna jarylyp, (tómengi bóliginde aǵyzý moıny opyrylyp qalǵan), dızel otyny jerge tógildi. Taǵy eki tsısternadaǵy suıyqtyq tógilip, jerge sińip ketken. Janarmaı órtenbedi. Dızeldi otyn tógilgen jer «kóbikpen» jabyldy», - dedi vedomstvodaǵylar.
Qutqarýshylardyń aıtýynsha, apattan eshkim zardap shekpegen. Oqıǵa basqa poıyzdardyń qozǵalysyna kedergi keltirmedi. Qazir apat ornynda tıisti jumystar jalǵasyp jatyr.
Aıta keteıik, buǵan deıin habarlaǵanymyzdaı Nur-Sultan-Kókshetaý temirjol ýchaskesindegi Aqkól stansasyndaǵy júk poıyzynyń 8 vagony relsten shyǵyp, dızeldi otyn tógilgen bolatyn.
