Aqkólde balalar úıi paıdalanýǵa berildi - Aqmola oblysy
Saltanatty sharaǵa qatysqan aımaq basshysy Sergeı Kýlagın balalar úıiniń ujymy men tárbıelenýshilerin qýanyshtarymen quttyqtady.
«Búgin barshamyz qýanyshty oqıǵanyń kýási bolyp otyrmyz. Bıylǵy oqý jylynyń alǵashqy kúni 4 mektepti paıdalanýǵa berý josparlanǵan. Bul baǵyttaǵy jumystardy odan ári jalǵastyra beretin bolamyz», - dedi S.Kýlagın.
Sondaı-aq, quttyqtaý sóz sóılegen QR Bilim jáne ǵylym mınıstriniń keńesshisi Balııa Ákimbekova da elimizde bilim berý salasynda atqarylyp jatqan ıgi ister týraly aıtyp ótti.
Shara barysynda qonaqtar balalar úıiniń tárbılenýshileri usynǵan «Jasa Qazaqstan» flesh-mobyn tamashalady. Sondaı-aq, balalar úıiniń ishki bólmeleri men shaǵyn fýtbol alańy, hokkeı korty jáne trenajer alańyn aralap kórdi.
Eske sala keteıik, osyǵan deıin Aqkól balalar úıi jarty ǵasyr buryn salynǵan ǵımaratty panalap keldi. 2015 jyly oblys ákimi Sergeı Kýlagınniń tapsyrmasymen búgingi balalar úıine kúrdeli jóndeý jumystary qolǵa alynǵan bolatyn. Ol úshin bıýdjetten 761,4 mıllıon teńge qarjy bólindi. Qazirgi kezde, 145 oryndyq nysanda balalardyń turyp, bilim alýyna jáne sportpen shuǵyldanýyna barlyq jaǵdaı jasalǵan. Oǵan qosa ınternet klýb bar. Zaman talabyna saı jabdyqtalǵan balalar úıine Stepnogor qalasyndaǵy balalar úıinen 40 tárbıelenýshi jetkizildi. Ondaǵy balalar úı aldaǵy ýaqytta balabaqsha retinde paıdalanylatyn bolady.
