Aqkól aýdanynda bıyl 6 myńnan astam sharshy metr turǵyn úı paıdalanýǵa berildi
KÓKShETAÝ. QazAqparat - Aqkól aýdanynda 6 myńnan astam sharshy metr turǵyn úı paıdalanýǵa berildi. Bul týraly aýdan ákimi Temirjan Edigenov aıtty, dep habarlaıdy QazAqparat tilshisi.
Aýdan ákiminiń sózine qaraǵanda, óńirde óndirilgen ónim kólemi boıynsha ónerkásip salasy kósh bastap tur. Máselen, aǵymdaǵy jyldyń toǵyz aıynda 3,4 mıllıard teńgeniń ónimi óndirilgen. Onyń ishinde irgeli kásiporyndar «QazOrmanKompanııasy» seriktestigi 133 mıllıon teńge, «Úsh bulaq-2005» seriktestigi 590 mıllıon teńgeniń ónimin óndirgen. Sonymen qatar, aýyl sharýashylyǵy salasynda oń ózgerister baıqalady. Onyń deni egin sharýashylyǵyna tıesili.
«Bıylǵy jyly aýdan dıqandary egistik alqaptyń ár gektarynan 11 tsentnerden ónim alyp, barlyǵy 138,7 myń tonna astyq jınady. Bul ótken jylǵy kórsetkishpen salystyrǵanda birshama joǵary»,- deıdi Temirjan Edigenov.
Sonymen qatar, aýdanda mal sharýashylyǵy salasynda da ilgeri basýshylyq bar. Jyl basynan beri aýyl sharýashylyǵy qurylymdaryna mal ónimderin shyǵarýǵa, selektsııalyq tóldi asyldandyrý jumystaryna 104 mıllıon teńge sýbsıdııa bólingen.
«Aýdan Astana qalasynyń aınalasynda azyq-túlik beldeýin damytýǵa da úles qosyp otyr. Óńirde etti mal sharýashylyǵyn damytý aıasynda qolǵa alynǵan memlekettik baǵdarlamalardy oryndaý baǵytynda keshendi sharalar júzege asyrylýda. Osy maqsatta aýdandaǵy «Qataev» jeke kásipkerligi «Yrys» baǵdarlamasy arqyly 50 bas sıyrǵa arnalǵan sút-taýarly ferma ashty. Oǵan qosa, osy sharýashylyq «Altyn asyq» baǵdarlamasy boıynsha 300 bas iri qara men qoı satyp alǵan. Alda taǵy Qaraǵandy oblysynan 500 bas iri qarany jetkizýdi josparlap otyr»,- dep sózin jalǵastyrdy aýdan ákimi.
Sonymen qatar, aýdan «Údemeli ındýstrııaldy-ınnovatsııalyq damý», «Bıznestiń jol kartasy-2020», «Jumyspen qamtýdyń jol kartasy-2020», «Nurly jer», «Sybaǵa», «Qulan» jáne «Bereke» tárizdi memlekettik baǵdarlamalarǵa da belsendi qatysýda. Osy baǵdarlamalardyń kómegimen aýdanda ónerkásip salasy men shaǵyn jáne orta bıznes te damý ústinde.
Al, qurylys salasyna keletin bolsaq, toǵyz aıda 5,5 mıllıon teńgeniń jumysy atqaryldy. Bul kórsetkish byltyrǵy jyldyń sáıkes kezeńimen salystyrǵanda birshama joǵary, ıaǵnı, 6 myńnan astam sharshy metr turǵyn úı ǵımarattary tapsyryldy. Oǵan qosa, ınfraqurylymdardy damytý, eldi mekenderdi sapaly aýyz sýmen qamtamasyz etý baǵytynda qomaqty qarjy bólinip, jobalar júzege asyrylýda. Onyń ishinde Kishi Barap, Jalǵyzqaraǵaı aýyldarynda sý qubyrlary jóndeletin bolsa, Azat aýylynda sý qubyryn salý boıynsha jobalyq-smetalyq qujattar ázirlenip otyr.
Máselen, «Terem.Ok» seriktestigi shaı japsyrmalaryn shyǵarýdy, «Kazanova» jeke kásipkerligi lımonad jáne sýsyn óndirisin, «Kenebaı» jeke kásipkerligi sút óndirisin iske qosýdy josparlap otyr.
«Aýdanda budan basqa da áleýeti joǵary jobalar barshylyq. Munyń barlyǵy aýdannyń áleýmettik-ekonomıkalyq damýy kórsetkishterin jaqsartyp, turǵyndardyń ál-aýqatyn arttyrý», deıdi aýdan ákimi.
Sonymen qatar, óńirde Elbasy Joldaýynda aıtylǵan áleýmettik salanyń damýyna da jete kóńil bólinýde. Ásirese, densaýlyq saqtaý, bilim, mádenıet jáne jumyspen qamtý baǵytynda biraz is tyndyrylǵan.
