ÁQK áskerı ınstıtýttary QR Qarýly kúshteri quramyna kiredi
Atalǵan ózgerister Qarýly kúshterdegi ásker túrleri qolbasshylyqtarynyń óz áskerleri úshin kadrlardy daıarlaýdaǵy jaýapkershiligin arttyrýǵa baǵyttalǵan. Bul kýrsanttarǵa barynsha áskerlerge jaqyn bolýǵa múmkindik beredi. Olar oqý ornynan keıin áskerlerde qyzmet atqarady, bolashaq ofıtserlerdiń jaýyngerlik daıarlyǵynyń praktıkalyq deńgeıin arttyryp, sapasyn kóteredi. Bilim berý protsessiniń mańyzdy quraly retinde praktıka kýrsanttardyń bolashaq kásibin meńgerýde aıtarlyqtaı rol atqarady.
Olar áskerı qyzmettiń qalyptasýyn kórip, kúndelikti is-qımylyna aralasady, ásirese, qazirgi ýaqytta ákelinip jatqan zamanaýı qarý-jaraq pen áskerı tehnıkany meńgeredi.
Sonymen, qazirgi kýrsanttar oqý ornyn aıaqtaǵannan soń óz isin biletin jáne tapsyrmalardy aıqyn túsinetin maman retinde qyzmetke kirisetin bolady. Aıta keter jaıt, áskerı oqý oryndaryn áskerlerge jaqyn ustaý baǵyttarynyń alǵashqy qadamy jasaldy. Qurlyq áskerleri bas qolbasshylyǵynyń basshylyǵymen, Qurlyq áskerleri áskerı ınstıtýtynyń professorlyq-oqytýshy quramnyń, Áýe qorǵanysy kúshteriniń jedel taktıkalyq tobynyń, Desantty-shabýyldaý áskerleriniń qatysýymen komandalyq-shtabtyq oqý-jattyǵýy ótkizilip, onyń nátıjesi Qurlyq áskerleriniń komandalyq býyny men áskerı oqý oryndarynyń professorlyq-oqytýshy quramymen birlesip oqytýdyń tıimdiligin kórsetti. Oǵan qosymsha aımaqtyq qorǵanys bólimsheleri, Ulttyq ulan, Shekara qyzmeti men TJM de qatysty.
Oqý-jattyǵý barysynda Qarýly kúshterdiń ásker túrleri men elimizdegi vedomstvalar arasyndaǵy ózara is-qımyldyń birlesken arnaıy operatsııasy oryndaldy. Qurlyq áskerleri bas qolbasshylyǵynyń basqarmasy osyndaı oqý-jattyǵýlarǵa QR QK Qurlyq áskerleri áskerı oqý ornynyń kýrsanttaryn qatystyrýdy josparlap otyrǵanyn atap ótti.
