Aqyn Jadyra Dáribaeva Prezıdent atynan memlekettik nagrada aldy
ASTANA. KAZINFORM — Mádenıet jáne óner qyzmetkerleri kúnine oraı aqyn Jadyra Dáribaeva «Parasat» ordenimen marapattaldy, dep habarlaıdy Mádenıet jáne aqparat mınıstrliginiń baspasóz qyzmeti.
Memlekettik nagrada Qazaqstan Respýblıkasy Prezıdentiniń Jarlyǵymen otandyq ádebıet pen mádenıettiń damýyna qosqan eleýli eńbegi úshin berildi.
Búgin aqyndy QR Mádenıet jáne aqparat mınıstrligi Mádenıet komıteti tóraǵasynyń orynbasary Sherhan Talap quttyqtap, onyń qazaq ádebıetiniń damýyna, rýhanı qundylyqtardy dáripteýge jáne ulttyq mádenı murany nasıhattaýǵa qosqan úlesin atap ótti.
— Óz kezeginde Jadyra Dáribaeva Memleket basshysyna eńbegine berilgen joǵary baǵa men mádenıet jáne óner qyzmetkerlerine kórsetilip kele jatqan qoldaý úshin alǵys bildirdi. Aqyn mádenıet qaıratkerlerine kórsetiletin qurmet otandyq ádebıettiń damýyna, rýhanı murany saqtaýǵa jáne ulttyq qundylyqtardy ulyqtaýǵa serpin beretinin aıtty, — delingen habarlamada.
Aıta keteıik, «Parasat» ordeni ǵylym, mádenıet, ádebıet jáne óner salalaryn damytýǵa, eldiń rýhanı ári zııatkerlik áleýetin nyǵaıtýǵa eleýli úles qosqan azamattarǵa beriledi.
Budan buryn Almatyda Prezıdent atynan mádenıet qaıratkerlerine 60 páter tabystalǵanyn jazǵan edik.
